प्रवेश मिश्र
राजविराज। सप्तरीको बिभिन्न नाका भएर लागुऔषध गाँजाको व्यापक तस्करी भइरहेको छ । पछिल्लो समय जिल्लाको बिभिन्न ठाउँबाट प्रहरीले भारी परिणाममा गाँजा बरामद गरेको छ ।
सप्तरी प्रहरीले गत शनिबार मात्रै टिपरमा बालुवाभित्र लुकाएर लैजाँदै गरेको अवस्थामा शुक्रबार कल्याणपूरबाट बरामद गरेको १० क्विन्टल ६ किलो गाँजा सार्वजनिक गरेको छ। गाँजा सहित प्रहरीले एक जनालाई समेत नियन्त्रणमा लिएको छ ।
४ पुषमा सशस्त्र प्रहरीले सप्तरीबाट २ सय ४० किलो गाँजा बरामद गरेको थियो ।जिल्लाको हनुमाननगर कंकालिनी नगरपालिका-८ कोशी नदिको पलारबाट लुकाई छिपाई राखेको अबस्थामा उक्त परिमाणको गाँजा बरामद गरेको थियो ।
त्यसअघि ९ मंसिरमा राजगढ-बनैनिया इलाकास्थित नेपाल-भारत सिमानामा फ्याँकिएको झोला चेक गर्दा २५ किलो गाँजा सशस्त्र प्रहरीले बरामद गरेको थियो । राति १२ बजे सशस्त्र प्रहरीको गस्ती टोली देखेर दुईजना पुरुष झोला फ्याँकेर भारतीय भूमितर्फ भागेका थिए । प्रहरीले झोला चेक गर्दा त्यसबाट गाँजा बरामद भएको थियो ।
त्यस्तै २०७९ पुस १४ जिल्लाको हनुमाननगर कंकालिनी नगरपालिका-१स्थित ब्यारेजबाट बालुबामा पुरेर राखिएको अवस्थामा ८ सय १० किलो गाँजा सप्तरी प्रहरीले बरामद गरेको थियो ।
यी तस्करीको उदाहरण मात्र हुन् ।यस्तो ठुलो तथा सानो परिणाममा निरन्तर यहाँबाट गाँजा तस्करी हुने गरेको स्थानीय बताउँछन् ।
‘यहाँबाट सधैँ गाँजा तस्करी भईनैरहन्छ , कहिले सानो परिणाममा त कहिले ट्रक र नाउमा हुन्छ,’ एक जना स्थानीयले भने, ‘लागुऔषध सेवनको हेर्नुस् न सात,आठ बर्षकै स्कुले बालकहरु पनि गाँजा, चुरोट खाएरहेको हुन्छ ।’
उनले यसमा सरोकारवाला गम्भीर नभए देशको भविष्यको के हुने हो भन्दै चिन्ता व्यक्त गरे ।
प्रहरीले पटकपटक भारी मात्रामा गाँजा बरामद गरे पनि एकदुई अवस्था बाहेक त्यसमा संलग्न गिरोहलाई समात्न सकेको छैन् ।
सप्तरी प्रहरीका प्रमुख एसपी गजुसिद्धि बज्रचार्यले बाहिरबाट आएको गाँजा भारत लैजान सप्तरी बाटोको रुपमा प्रयोग भइरहेको बताए ।
‘अस्ति हामीले १० क्विन्टल गाँजा र एक जना मानिस नियन्त्रणमा लिएको हो, त्यसको औरिजिन(मुख्य प्वाइन्ट) कहाँ छ, अनुस्धान गरिरहेको छौँ,’ उनले भने, ‘यो सप्तरीमा तयार भएको होइन्, बाहिरैबाट आएको हो, सप्तरी ट्रान्जिट प्वाइन्ट मात्र हो ।’
नेपालबाट तयार भएर भारत निर्यात गरिएको गाँजा उता ३० देखि ३५ हजार रुपैयाँ प्रति किलो विक्री हुने गरेको बुझिएको छ ।
