क्रान्ति केन्द्र सम्वाददाता
राजविराज । पत्रकारहरुको समस्या समाधानमा आम सञ्चार प्राधिकरण प्रतिबद्ध रहेको प्राधिकरणका अध्यक्ष श्याम सुन्दर यादवले बताएका छन् ।बिहिबार नेपाल पत्रकार महासंघ सप्तरीले आयोजना गरेको ‘३०औं लोकेन्द्र स्मृति दिवस’मा बोल्दै उनले निर्भिकताको साथ सदाचारयुक्त समाचार सम्प्रेषण गर्न सबैमा आग्रह गरे ।
‘सप्तरीको पत्रकारिता देशमै प्रशंसा योग्य रहेको छ, केही युटुबरहरूले पत्रकारहरुको नाम बदनाम गर्दै आएकोले सचेत हुन आवश्यक छ,’ उनले भने, ‘पत्रकारहरुले विश्वासनीय, सबैले पत्याउने पत्रकारिता गर्नुपर्छ ।’
कार्यक्रममा पत्रकार लोकेन्द्र बुढाथोकीको स्मृतिमा महासंघ सप्तरीले स्थापना गरेको लोकेन्द्र स्मृति पत्रकारिता पुरस्कार यसवर्ष पत्रकार डम्बर प्रसाद राइलाई प्रदान गरिएको छ । राइलाई नगद ५ हजार ५ रुपैयाँसहित यो पुरस्कार प्रदान गरिएको छ ।
त्यस्तै ‘वातावरण पत्रकारिता पुरस्कार’ राससमा सप्तरीबाट कार्यरत पत्रकार अरुण कुमार यादवलाई प्रदान गरिएको छ । उक्त पुरस्कार राजविराजबाट प्रकाशित आजको वातावरण दैनिक पत्रिकाका प्रकाशक तथा सम्पादक प्रेस स्वतन्त्रता सेनानी वैद्यनाथ झाले स्थापना गरेको छ । उक्त पुरस्कार प्रत्येक वर्ष पुस २६ गते उमा सिंह स्मृति दिवसको अवसर पारेर वितरण गरिँदै आएको छ ।
कार्यक्रममा नेपाल पत्रकार महासंघका केन्द्रिय सदस्य ललिता साह ,नेपाल पत्रकार महासंघका पूर्व अध्यक्षहरु बैद्यनाथ झा, मुरली प्रसाद यादव, धिरेन्द्र प्रसाद साह ,वरिष्ठ पत्रकार अनिल कुमार अनल लगायतकाले मन्तव्य व्यक्त गरे । महासंघका सचिव राम नारायण विश्वासद्वारा संचालित कार्यक्रमम स्वागत सह-सचिब गोपाल गुप्ताले गरे भने सल्लाहकार मनोहर कुमार पोखरेलले लोकेन्द्र बुढाथोकीको जिवनी बारे चर्चा गरे ।
कार्यक्रममा प्रेस मंच सप्तरीका अध्यक्ष भुषन सिंह , प्रेस युनियन सप्तरीका अध्यक्ष बिनय कुमार लाल कर्ण , प्रेस सेन्टर सप्तरीका अध्यक्ष दिनानाथ यादव लगायतका बिभिन्न संचार माध्यमा आबद्ध पत्रकारहरुको उपस्थिति रहेको थियो ।
