क्रान्ति केन्द्र सम्वाददाता
राजविराज । प्रेस मंच नेपाल, सप्तरीले चारबुँदे मागसहित नेपाल पत्रकार महासंघ शाखा सप्तरीलाई ज्ञापन पत्र बुझाएको छ।
सोमबार मंचका अध्यक्ष भुषण सिंह सहितको टोलीले महासंघ सप्तरी शाखाका अध्यक्ष श्रवण देवलाई पत्र बुझाएको छ ।
पत्रमा सदस्यता शुद्धिकरणको सन्दर्भमा विभिन्न राजनीतिक दलमा आबद्ध केन्द्रीय हैसियतका पत्रकारहरुलाई शुद्धिकरणमा महासंघको केन्द्रीय समितिले समावेश नगरेको तथ्य जानकारीमा आएको भन्दै शुद्धिकरण अभियान सतप्रतिशत तोकिएको मापदण्ड बमोजिम कार्यान्वय गर्न माग गरेको छ ।
त्यस्तै महासंघ शाखा सप्तरीको वार्षिक साधारण सभा १५ दिनभित्र आयोजना गर्न माग गरिएको छ । ‘ नेपाल पत्रकार महासंघ शाखा सप्तरीको साधारण सभा केन्द्रको निर्देशन बमोजिम स्थगित भएको सूचना प्रति गम्भिर ध्यानाकर्षण भएको छ । तीन वर्षमा महासंघको साधारण सभा अनिवार्यरुपमा गर्नुपर्नेमा सदस्यता शुद्धिकरण एवं उक्त कार्य केन्द्रबाट हालसम्म टुंगो नलागेको अवस्थामा पछिल्लो जिल्ला अधिवेशनबाट कायम रहेको सदस्य संख्याको आधारमा यही पुस १९ गते प्रेस मञ्च जिल्ला कार्य समितीले जारी गरेको विज्ञप्तिमा उल्लेख भए बमोजिम १५ दिनभित्र साधारण सभा आयोजना गर्न महासंघको शाखा सप्तरीसँगसमेत प्रेस मञ्चको आग्रह छ,’ पत्रमा भनिएको छ ।
त्यस्तै सप्तरी जिल्लालाई कार्यक्षेत्र बनाएर पत्रकारिता गरिरहेका नयाँ पत्रकारलाई महासंघको सदस्यता प्रदान गर्न र महासंघको शाखा सप्तरीमा भएको आर्थिक क्रियाकलापकोसमेत आन्तरिक छानविन गर्न माग गरेको छ । माग पुरा नभए प्रेस मंच आन्दोलनमा उत्रिन बाध्य हुने चेतावनी समेत दिएको छ ।
