क्रान्ति केन्द्र सम्वाददाता
राजविराज । सप्तरीको तिलाठी कोइलाडी गाउँपालिकामा जनता समाजवादी पार्टी नेपालको ६१ सदस्यीय पालिका कमिटी तथा ४१ सदस्यीय महिला समाजवादी संघ गठन गरिएको छ ।
बिहिबार तिलाठी कोइलाडी गाउँपालिका -३ सकरपुरामा जसपाको नेताकार्यकर्ता भेलाले माधव रायको नेतृत्वमा ६१ सदस्यीय गाउँपालिका कमिटी तथा आशा देवीको नेतृत्वमा महिला समाजवादी संघ सर्वसम्मतिले गठन गरिएको पालिकाका सचिव शिवनाथ यादवले जानकारी दिए ।
पालिकाका कार्यबाहक अध्यक्ष माधवको अध्यक्षतामा आयोजित कार्यक्रमा प्रमुख अतिथि जसपा राजनीतिक समिति सदस्य तथा केन्द्रीय सदस्य विनोद चौधरी रहेका थिए ।
कार्यक्रममा जसपा नेता शम्भु झा, जिल्ला कार्यकारिणी समिति सदस्य निरज मुक्ती, निलेश सुचिता यादव, जसपाबाट निर्वाचित तिलाठी कोइलाडीका वडा नं १का वडाध्यक्ष दिनेश्वर मिश्र, ३का रमेश मुखिया, ७का हरि यादव, ८ का सत्यनारायण यादव, हनुमाननगर कंकालिनी नगरपालिका १४का वडाध्यक्ष कृष्ण कुमार यादव, पालिकाका कार्यपालिका सदस्य रीता साह, कृष्ण प्रसाद दास, नितु खंग लगायतका व्यक्तिहरुले मन्तव्य राखेका थिए ।
त्यस्तै जसपाका सुभाष यादव, जिवछ यादव, गोसाइ यादव, जुगेश्वर मण्डल, निरञ्जन मण्डल, ललित झा, जितेन्द्र यादव लगायतका वक्ताहरुले मन्तव्य राखे । कार्यक्रममा ६ सय भन्दा बढी स्थानीयबासी तथा कार्यकर्ताहरुको उपस्थिति रहेको थियो ।
जसपाको सप्तरीमा उमेश यादव तथा केदार यादवको नेतृत्व गरि दुई जिल्ला कार्यसमिति रहेको छ । दुवै कार्यसमितिले आफुलाई पार्टीको वैधानिक जिल्ला समिति रहेको दाबी गर्दै आएका छन् ।
