क्रान्ति केन्द्र सम्वाददाता
राजविराज । सप्तरीको रूपनी गाउँपालिका अध्यक्ष दिनेश यादवले आफू माथि लगाइएको चोरी डाँका मुद्दा निराधार रहेको बताएको छ । शनिबार पत्रकार सम्मेलनको आयोजना गरि उनले केही व्यक्तिहरूले चरित्र हत्या गर्न झूठो प्रचारबाजी गरी आफूलाई असफल अफवाह फैलाएको बताए ।
‘मोबाइल चोरी र नगद लुटेको आरोप लगाएर जुन मुद्दा दिइएको छ, त्यो एकदमै गलत हो, मैले उहासँग कुनै दुर्व्यवहार गरेको छैन्, उनको शरिरमा छोएको पनि छैन् ।’ स्थानीय राजु जयसवालले उनिमाथि दिएको चोरी तथा डाँका मुद्दा सन्दर्भमा अध्यक्ष यादवले भने, ‘उनले गाउँपालिकाको गाडी दुर्घटना हुँदा फेसबुकमा कमीसनको चलखेलमा गाडी दुर्घटना भनेर लेख्नु भएको थियो त्यसमा किन्न भ्रमाक प्रचार गर्नुहुन्छ, सोधेको मात्र हो ।’
उनले यसपालि अन्य पालिकाको तुलनामा सबभन्दा आफ्नो पालिकामा कम बाहियात खर्च हुने दाबी समेत गरे ।
अध्यक्ष यादवसहित , निवर्तमान वडाध्यक्ष पीताम्बर यादव, सरोज यादव र राम यादवउपर मुद्दा रुपनी गाउँपालिका– १ का किरणकुमार जयसवालले गत २३ साउनमा अदालतमा मुद्दा दायर गरेका थिए।
गाउँपालिका अध्यक्ष यादवसहित चारजनाले हातपात गर्दै कमिशनको प्रमाण रहेको माेवाइल लुटेको भन्दै जयसवालले गत २६ असारमा जिल्ला प्रहरी कार्यालयमा जाहेरी दिएका थिए । तर, प्रहरीले जाहेरी दर्ता नगरेपछि जयसवालले उच्च अदालतमा मुद्दा दायर गरेका थिए ।
उक्त मुद्दामा उच्च अदालतका न्यायाधीशद्वय वामदेव ज्ञवाली र राधाकृष्ण उप्रेतीको संयुक्त इजलासले शुक्रबार जिल्ला प्रशासन र जिल्ला प्रहरी कार्यालयको नाममा परमादेश जारी गरेको छ ।
