क्रान्ति केन्द्र सम्वाददाता
भारतको मणिपुरमा सोमबार दिउँसो भएको हिंसात्मक घटनामा १३ जनाको मृत्यु भएको छ । भारतीय संचार माध्यमका अनुसार तेङ्गनौपाल जिल्लाको साइबोल नजिकैको लेथिथु गाउँमा आतङ्ककारीहरूको दुई समूहबीच भीषण गोलीबारी भएको हो ।
मणिपुरको हिंसा प्रभावित क्षेत्रमा विगत ७ महिनादेखि इन्टरनेट प्रतिबन्ध लगाएको थियो । जसलाई सरकारले आइतबार हटाएको छ । इन्टरनेट प्रतिबन्ध हटाएपछि हिंसाको घटना पुनः भएको, भारतीय सञ्चार माध्यमहरुले जनाएको छ ।
सुरक्षा अधिकारीहरूका अनुसार, ‘नजिकैको सुरक्षा बलहरू यस ठाउँबाट करिब १० किलोमिटर टाढा छ । हाम्रा सेनाहरू घटनास्थलमा पुगेपछि उनीहरूले लेथु गाउँमा १३ वटा शव फेला पारे ।’
सुरक्षा बलका अनुसार शव नजिकै कुनै हतियार भेटिएको छैन् । प्रहरी र सुरक्षाकर्मीले मृतकको पहिचान पुष्टि गर्न सकेका छैनन् । घटनापछि प्रहरीले घटनास्थलमा पुगेर अनुसन्धान सुरु गरेको छ ।
गत मे ३ देखि मणिपुरमा माइतेई र कुकी जातीय बीच द्वन्द्व चलिरहेको छ । यी झडपमा कम्तीमा १८२ जनाको ज्यान गएको छ भने करिब ५० हजार घरबारविहीन भएका छन् । हिंसाका कारण मणिपुरमा मे ३ देखि इन्टरनेट सेवा बन्द गरिएको छ । सेप्टेम्बर २३ मा केही समयका लागि हटाइयो थियो, तर सेप्टेम्बर २६ मा फेरि इन्टरनेटमा प्रतिबन्ध लगाइयो।
