क्रान्ति केन्द्र सम्वाददाता
राजविराज । बारामा मेला आयोजनाको विषयमा विवाद भएर दुई पक्षबीच झडप भएको छ ।
पचरौता नगरपालिका-७ बेनौलीमा झण्डा मेला गर्ने विषयमा सोमबार राति भएको छलफलमा दुई पक्षबीच विवाद हुँदा ढुंगा हानाहान भएको थियो ।
अवस्था सामान्य बनाउन प्रहरीको आठ राउन्ड हवाई फायर गरेको बाराका प्रहरी प्रमुख एसपी सुरेशप्रसाद काफ्लेले जानकारी दिए ।
झडपमा परी घाइते भएको स्थानीय लक्ष्मी पटेल र चण्डीका पटेलको कलैया प्रादेशिक अस्पतालमा उपचार भइरहेको प्रहरीले जनाएको छ ।
मेला गर्ने विषयमा सयौंको संख्यामा उपस्थित स्थानीयबीच ब्रह्माको मूर्ति पूजनको विषयमा विवाद भएको थियो । विवादले उग्र रुप लिँदा स्थिति तनावग्रस्त बनेको थियो । नगरपालिकाले तोकेको स्थानमा मूर्ति पूजा गर्न एउटा पक्षले नमानेपछि झडप भएको बुझिएको छ ।
