क्रान्ति केन्द्र सम्वाददाता
राजविराज । सप्तरीको तिलाठी कोइलाडी गाउँपालिका वडा नं ३ सकरपुरामा वडा कार्यालयले सामाजिक सुरक्षा भत्ता पाउनेको लागि प्रोढ शिक्षा संचालन गर्ने भएको छ।
वडा कार्यालयले त्यसको पहिलो चरणमा ९ जना स्वयंसेवक र एक जना सुपरभाइजरलाई २ दिने तालिम समेत दिएको वडाध्यक्ष रमेश कुमार मुखियाले बताए ।
वडामा रहेको समाजिक सुरक्षा भत्ता पाउने सेवाग्राहीहरुको सहजताको लागि उक्त कार्यक्रम गर्न थालिएको उनले बताए ।
‘यस वडामा वृद्धवृद्धा, एकल महिला, अपाङ्ग तथा पोषण भत्ता पाउने गरि ९ सय सामाजिक सुरक्षा भत्ता पाउने सेवाग्राहीहरु छन्, जसमा ६०देखि ७०प्रतिशतलाई साइन गर्न आउँदैन्, उनीहरूको लागि सुरक्षा भत्तासम्म पाउन अति नै कठिन हुन्छ’, उनले भने, ‘भत्ता खातामा आएको सुन्नै बित्तिकै बैंकमा जान्छन्, बिहानदेखि बेलुकासम्म बस्छन् तर हस्ताक्षर गर्न नसक्ने सबैलाई त्यहीँ पुग्नुपर्ने भएकोले भीड लामो हुन्छ, पछि खाली हात फर्केर आउनुपर्छ, एकैदिनमा काम हुँदैन्।’
हस्ताक्षर गर्न सक्नेको लागि पुग्नुपर्ने बाध्यता नरहेकोले सामाजिक सुरक्षा भत्ता पाउन सहज बनाउन सेवाग्राहीहरुको लागि प्रोढ शिक्षा संचालन गर्न लागेको बताए ।
वडाध्यक्ष मुखियले भने, ‘मैले चुनावको बेलामा आफु जितेपछि समाजिक सुरक्षा भत्ता सहजै पाउन सक्ने व्यवस्था मिलाउने बाचा गरेको थिएँ, त्यसको विकल्पहरू खोज्दा सेवाग्राहीले चेकमा हस्ताक्षर गर्न सकिए जो कोहीले पनि उसको चेक लिएर बैंकबाट साटेर आउन सक्छ, त्यसमा समय पनि लाग्दैन बुझेपछि प्रोढ शिक्षा संचालन गरेर बरु साइन गर्न सक्ने अवस्था बनाऔं, सोच आयो ।’
उनले यो कार्यक्रम एक महिनासम्म चल्ने बताए । र कार्यक्रमलाई प्रभावकारी ढंगले सम्पन्न गराउन आफु पनि यसको निरन्तर अनुगमनमा रहने बताए ।
