क्रान्ति केन्द्र सम्वाददाता
राजविराज । माओवादी नेता गोबिन्द चाैधरीकाे हत्याको आरोपी मधेश प्रदेशका सांसद अनिरुद्ध प्रसाद सिंह यादव धरौटीमा रिहा भएका छन् ।
उच्च अदालत जनकपुर, राजविराजको न्यायाधीशद्वय मुनेन्द्रप्रसाद अवस्थी तथा पूर्णप्रसाद राजवंशीको संयुक्त इजलासले बिहिबार उनलाई १ लाख २० हजार धरौटी लिएर रिहा गर्न आदेश दिएको हो ।
२०६४ साल असार ९ गते चौधरीलाई अपहरण गरी सोही दिन नेङ्गडा गाविस-५ वैरिया टोलमा पुर्याई सिंहको निर्देशनमा हत्या गरिएको आरोप छ ।
मुलतबीमा रहेकाे उक्त मुद्दामा उनलाई १७ भदौमा पक्राउ गरि १८ भदौमा सप्तरी जिल्ला अदालतमा पेश गर्दा अदालतले पुर्पक्षका लागि थुनामा पठाउने आदेश दिएको थियोे । त्यसपछि उनको पक्षले उच्च अदालतमा रिट दायर गरेको थियो ।
त्यसयता सिंह संसदबाट निलम्बित रहेका छन् ।
