क्रान्ति केन्द्र सम्वाददाता
राजविराज । सप्तरी -२बाट निर्वाचित संघीय सांसद डा.चन्द्रकान्त राउतको संयोजकत्वको ५ सदस्यीय संघीय संसदीय उपसमितिले सप्तरीका निर्माणधिन आयोजनाहरुको बिहिबार अनुगमन गरेको छ ।
संसदीय पूर्वाधार विकास समितिको निर्णायानुसार उनीहरूले जिल्लामा निर्माणाधिन अवस्थामा रहेकाे राजविराजस्थित बसपार्क, सपिङ्ग कम्पेलेक्स, अस्पताल, हुलाकी राजमार्ग अन्तर्गतको राजविराज-पकली कन्चनपुर सडक खण्ड, कठौना- पातो सडक खण्ड, बलान नदीदेखि राजविराजसम्मको सडक खण्ड, रुपनी- राजविराज- हनुमाननगर सडक खण्ड, राजविराज-छिन्नमस्ता सडक, रुपनी कटैया छिन्नमस्ता सडक, भारदह डेढहा- पकरी सडक, इनरुवा- तिलाठीकोइलाठी सडक आयोजनाको स्थलगत अनुगमन गरेका हुन् ।
बिहिबार बिहान राजविराजस्थित निर्माणधिन बसपार्क, सपिङ्ग कम्पेलेक्स तथा गजेन्द्रनारायण सिंह अस्पतालमा निर्माणधिन भवनहरूको अनुगमन पश्चात संचारकर्मीहरुसँग कुराकानी गर्दै उपसमितिको संयोजक राउतले मुल ठेकेदारहरुको लापरवाहीको कारण निर्माणमा ढिलाई भएको बताए ।
‘मुल ठेकेदारहरुको लापरवाहीले आयोजनाहरु तयार हुनुमा विलम्व भएको हो,’ उनले भने, ‘अस्पतालको भवन, सपिङ्ग कम्पलेक्समा काम भएको छ सही तरिकाले काम गरियो भने दुई तीन महिनामा काम पुरा हुन्छ ।’
उनले संसदीय अनुगमन समिति आइरहेको बुझ्दा समेत मुल ठेकेदार निर्माण स्थलमा नरहेकोप्रति आक्रोश व्यक्त गरे ।
उनले भने, ‘अनुगमन टोली आइरहेको बुझेपनि उनीहरू आएनन्, चरम लापरवाही देखाएको छ ।’
अगाडिको कारबाही सम्बन्धमा संयोजक राउतले समितिमा प्रतिवेदन पेश गरि ठेकेदारसँग छलफल गर्ने बताए ।
उनले भने, ‘संसदीय समितिमा प्रतिवेदन पेश गर्ने छौँ, ठेकेदारसँग बसेर छलफल गर्ने छौँ, त्यसपछि पनि काम गर्न लापरवाही गरे कारबाही अगाडि बढाउ छौँ, कालोसुचीमा राख्न सिफारिस गर्छौं।’
अनुगमन टोलीमा सप्तरी -३बाट निर्वाचित सांसद दिनेश यादव, सांसदहरु निशा डाँगी, विना लामा, सुशिला श्रेष्ठ रहेकी थिइन् ।
