क्रान्ति केन्द्र सम्वाददाता
राजविराज । सप्तरीको बिष्णुपुर गाउँपालिका वडा नं ६को कार्यालयमा गरिएको तालाबन्दी प्रकरणमा वडाध्यक्ष परमानन्द यादवले आफ्नो पक्ष सार्वजनिक गरेका छन् ।
बुधबार उनले पत्रकार सम्मेलन गर्दै आफुलाई राजनीतिक प्रतिशोधको कारण बदनाम गर्न खोजिएको बताएका छन् ।
उनले आफु विशेष कामले पालिकाबाहिर गएको बेला राजनीतिक प्रतिद्वन्द्वीहरुले बदनाम गर्ने नियतले षडयन्त्र गरेर तालाबन्दी गरेको आरोप लगाएका छन् ।
‘१२ गते उनीहरु निवेदन लिएर आउनु भएको थियो, मैले चाडपर्व सकेपछि आफुसँग भएको जानकारी उपलब्ध गराउने भनेको थिएँ, उहाँहरूले माग गर्नुभएको कागजात त मसँग हुँदैन्, सबै थोक पालिकामै हुन्छ, चाडपर्वपछि मैले पालिकासँग लिएर उपल्ब्ध गराउने भनेको थिएँ,’ उनले भने, ‘पालिकाको कागजात त लेखा शाखामा छ, र एकाउन्टेन्ट टेकनारायण यादव अहिले निलम्बनमा हुनुहुन्छ, अहिलेसम्म साँचो पनि बुझाउनुभएको छैन्, तैपनि मैले पर्वको पछि आउन भने, म कागज उपलब्ध गराउनु तयार छुँ भने ।’
उनले १३ गतेदेखि केही दिनको लागि आफु विशेष कामले बाहिर जान लागेको कुरा पनि निवेदन लिएर आएका व्यक्तिहरुलाई जानकारी गराएको बताए ।
पत्रकार सम्मेलनमा वडाध्यक्ष यादवले भने, ‘१३ गतेदेखि म विशेष कामले बाहिर जान लागेको भएकोले वडा सदस्य रिता देवी सदालाई २० गतेसम्मको लागि लिखित रूपमा निमित्त वडाध्यक्षको जिम्मेवारी दिएको थिएँ ।’
वडाध्यक्ष यादवसँगै पत्रकार सम्मेलनमा रहेकी वडा सदस्य सदाले आफुलाई १४ गते वडा कार्यालयबाट निकालेर तालाबन्दी गरेको बताईन् । ‘म वडा कार्यालयमा थिएँ, उहाँहरू आएर मलाई तालाबन्दी गर्छौं भन्दै, पटकपटक बाहिर निस्कन भन्नुभयो,’ उनले भनिन्, ‘मैले वडाध्यक्ष ज्यु बाहिर जानुभएको छ, आएपछि कुरा गर्नुहोला भनेपनि उहाँहरुले मान्नु भएन्, अन्तमा म बाहिर निस्केपछि उहाँहरुले ताल लगाइदिनु भयो ।’
वडाध्यक्ष यादवले तालबन्दी गरेको संघर्ष समितिको संयोजक राजेश कुमार राय वडा निर्वाचनमा जनता समाजवादी पार्टीबाट आफ्नो प्रतिस्पर्धी रहेको बताए । वडाध्यक्ष यादवले जसपाबाट निर्वाचित विष्णुपुर गाउँपालिका अध्यक्ष उमेश यादव अख्तियारको मुद्दाले निलम्बनमा परेदेखि नै राजेशले उनलाई पटकपटक टर्जर गरिरहेको आरोप लगाए । ‘गाउँपालिका अध्यक्ष उमेश यादवज्यु निलम्बनमा परेदेखि नै राजेशले टर्जर गरिरहेको छ, मेरो सबै योजनाहरुमा डिस्टर्ब गरिरहेको हुन्छन्,’ उनले भने, ‘उहाँहरुलाई लाग्छ मैले नै पालिका अध्यक्ष ज्यूलाई फसाएको हो ।’
वडाध्यक्ष यादवले वडा कार्यालयको ताला खोलाउनको लागि प्रहरी, प्रशासनसँग पनि समन्वय गरिरहेको बताए । उनले आफु सुचना उपलब्ध गराउन तयार रहेको बताए ।
आर्थिक बर्ष २०७९/०८० को आयव्यय सार्वजनिक गर्नुपर्ने, प्रधानमन्त्री स्वरोजगार कार्यक्रमको योजना सार्वजनिक गर्नुपर्ने, कर्मचारी भर्ना प्रक्रिया सार्वजनिक गर्नुपर्ने, उपभोक्ता समिति गठन प्रक्रिया पारदर्शी गर्नुपर्ने लगायतका मागसहित राजेश कुमार रायको संयोजकत्वको संघर्ष समिति तालबन्दी गरेको छ ।
