क्रान्ति केन्द्र सम्वाददाता
राजविराज । राजविराजस्थित गजेन्द्र नारायण सिंह अस्पतालको प्रमुख मेडिकल सुपरिटेन्डेन्ट डा. अवधेश कुमार मिश्रले अस्पातालको सरसफाईमा विशेष ध्यान दिने बताएका छन् ।
बुधबार मेसुको रुपमा पदभार ग्रहण गरेपछि क्रान्ति केन्द्रसँग कुराकानीमा उनले सरसफाईमा कमी अस्पातालको एक प्रमुख समस्याको रुपमा रहेको भन्दै त्यसलाई समाधान गर्न विशेष ध्यान दिने बताएका छन् ।
उनले भने,’अस्पतालको एक प्रमुख समस्याको रुपमा सरसफाईको समस्या छ, सरसफाईलाई प्राथमिकतामा राखेका छौं, त्यसमा विशेष ध्यान रहनेछ, त्यसलाई समाधान गर्छौँ ।’
उनले अस्पातालको ओपीडी तथा इमर्जेन्सीको सेवालाई अझै थप गुणस्तरीय बनाउने बताएका छन्।
‘अस्पतालको सेवा प्रवाहलाई अझै गुणस्तरीय बनाउन टिममा छलफल गरि योजना बनाएर अगाडि बढ्ने छौँ,’ उनले भने, ‘हुन त पहिले तुलनामा इमर्जेन्सीको सेवामा धेरै नै सुधार आएको छ, तर त्यसलाई अझै कसरी गुणस्तरीय बनाउन सकिन्छ भन्नेमा काम गर्ने सोच छ, ओपीडीमा पनि डाक्टरहरु बस्ने समय र सेवा प्रवाहलाई अझै राम्रो बनाउने तर्फ काम गर्ने छौँ ।’
उनले यसको लागि अन्य अस्पातालको काम गर्ने राम्रो शैलीको पनि अध्ययन गर्ने बताएका छन् ।
कात्तिक १० गतेको मन्त्रिस्तरीय निर्णयले डा.मिश्रलाई अर्को व्यवस्था नभएसम्मका लागि आर्थिक तथा प्रशासनिक अधिकार सहित अस्पतालको प्रमुख मेडिकल सुपरिटेन्डेन्टको जिम्मेवारी तोकिएको हो ।
