क्रान्ति केन्द्र सम्वाददाता
राजविराज । राजविराज नगरपालिकाले आर्थिक बर्ष २०७८/०७९ र ०७९/०८० मा सम्पन्न गरेका तथा भुक्तानी नपाएका योजनाहरुको भुक्तानी दिने भएको छ ।
कार्यवाहक नगरप्रमुख इसरत परविनको अध्यक्षतामा बुधबार आयोजित चाडपर्वको शुभकामना आदानप्रदान तथा नगर सभा सार्वजनिकिकरण कार्यक्रममा बजेट, नीति तथा कार्यक्रम प्रस्तुत गर्दै उक्त जानकारी दिइएको हो ।
उक्त भुक्तानीको लागि यस आर्थिक वर्षमा १४ करोड बजेट विनियोजन गरिएको नगरपालिकाका प्रवक्ता जयनारायण मंडलले जानकारी दिए ।
यद्यपी कामको पुनः अनुगमन र मुल्याकंन गरि काम अनुसारकै भुक्तानी दिने समेत उनले बताए ।
राजविराज नगनगरपालिकाले चालु आर्थिक वर्षको लागि नगरसभाबाट १ अर्व ११ करोड ३२ लाख ७८ हजार बजेट ल्याएको छ ।
नगरपालिकाले चालु आर्थिक वर्षको खर्चमा नगर सभा संचालन खर्चलाई गत वर्ष जस्तै यथावत राखेको छ । जुनकी १० लाख रहेको छ ।
त्यस्तै नगरपालिकाले गजेन्द्रनारायण सिंह अस्पताललाई गत वर्ष दिएको अनुदानमा १० लाख रकम बढाउँदै गर्दै यस वर्ष ३५ लाख दिने निर्णय गरेको छ ।
नगरपालिकाले कार्यालय तर्फ सरसफाई साधन बाहेकको मर्मत सम्भारमा गत वर्षको बजेटमा १५ लाख घटाउँदै यस वर्ष २० लाख मात्र बजेट विनियोजन गरेको छ ।
पालिकाले नगरभित्र हाइ मास्ट टावर जडान तथा सिसिटिभि जडानका समेत बजेट छुट्याएको छ ।
