क्रान्ति केन्द्र सम्वाददाता
राजविराज । छिन्नमस्ता गाउँपालिकाले आर्थिक वर्ष २०८०/०८१को प्रथम चेक प्रसिद्ध शक्तिपीठ छिन्नमस्ता भगवतीको नाममा काटेको छ। पालिकाले छिन्नमस्ता भगवती संरक्षण सम्वर्द्धन कमिटीको नाममा काटेको एक लाख १ हजारको चेक घटस्थापनाको साँझ (आइतबार पिठाधिस महाकान्त ठाकुरलाई हस्तान्तरण गरिएको छ ।
पालिकाका अध्यक्ष विद्यानन्द चौधरी, उपाध्यक्ष राजो देवी यादव र प्रमुख प्रशासकीय अधिकृत ललन यादवले संयुक्त रुपमा चेक पिठाधिश ठाकुरलाई हस्तान्तरण गरेका छन्।
‘छिन्नमस्ता गाउँपालिकामा म निर्बाचित भएयता गाउँपालिकाको हरेक आर्थिक बर्षको पहिलो चेक माताको पुजापाठको लागी काटी मात्र अरु चेक काट्ने परम्परा बसालेका छुँ,’ पालिका अध्यक्ष चौधरीले भने, ‘त्यसै अनुसार दशैंको पहिलो दिन गंगा आरतीको बेला माताको पुजापाठ तथा आरतीको लागि एक लाख एक हजारको चेक पिठाधिशज्युलाई हस्तान्तरण गरि आरतीको सुरुवात गरियो।’
प्रत्येक वर्ष दशैंमा छिन्नमस्ता (सखडा) भगवती मन्दिरमा पुजापाठ गर्न लाखौंको संख्यामा भक्तजन आउने गर्छन्। यसवर्ष दश लाख भक्तजन सखडा आउने आकंलन मन्दिर समितिले गरेको छ।
त्यसै अनुसार सुरक्षा व्यवस्था पनि कडा गरिएको छ। भक्तजनहरूको स्वास्थ्य उपचार तथा आपतकालीन अवस्थाको लागि एम्बुलेन्सको व्यवस्था पनि गरिएको जनाइएको छ।
