क्रान्ति केन्द्र सम्वाददाता
राजविराज । पुर्वप्रधानमन्त्री तथा नेकपा(एस)का नेता झलनाथ खनालले संविधानले दिएका हक अधिकार जनताले अझैसम्म उपभोग गर्न नसकेको टिप्पणी गरेका छन् ।
नेकपा(एस)ले थालेको मेची-महकाली समाजवादी जागरण अभियान-२०८०लाई सोमबार राजविराजमा सम्बोधन गर्दै उनले जनक्रान्तिले ल्याएको शासन व्यवस्थामा पनि जनताले मौलिक अधिकारको प्रत्याभूति गर्न नसकेको बताए ।
‘संविधानले दिएको ३१ वटा मौलिक हकलाई कार्यन्वयन गर्न ३ बर्षमा संसदबाट ऐन कानुन बनाउनुपर्ने हुन्छ तर कुनै पनि सरकारले ऐन बनाउन सकेको छैन्,’ उनले भने ‘यसले शिक्षा प्राप्त गर्नैपर्ने मौलिक हक, स्वास्थ्य उपचार प्राप्त गर्नैपर्ने मौलिक हक, गास, वास, कपासका हकबाट जनता वञ्चित रहेका छन्, खान पाउने,बाँच्न पाउने हक भन्दा अरु ठुलो हक हुन सक्दैन् यसको लागि ऐन बनाउन लागिपर्ने थियो जुन हुन सकेको छैन् ।’
उनले एमाले सरकारले गरेको संसद विघटनले देशमा राजनीतिक अस्थिरता आएको बताएका छन् ।
उनले भने, ‘राजनितिक संकट भन्दा पहिला दुई पार्टीको बहुमत हुन्थ्यो, तर त्यतिबेला आफैले प्राप्त बहुमतमा गरिएको संसद विघटनले मुलकलाई अस्थिरताको चक्र तर्फ धासाउने काम सुरु भयाे।’
उनले सरकारले जनताको आवश्यकतालाई सम्बोधन गर्न नसकिरहेको बताउँदै मुलुकमा पुँजीवादी व्यवस्थाले आर्थिक संकट महंगी बढिरहेको आरोप लगाएका छन् ।
उनले यी सब समस्या समाजवादले मात्र समाधान हुनसक्ने बताएका छन् ।
