क्रान्ति केन्द्र सम्वाददाता
राजविराज । डेढ दशकदेखि निर्माणधिन अवस्थामा रहेको राजविराजस्थित महेन्द्र विन्देश्वरी बहुमुखी(मविब) क्याम्पसको छात्रावासलाई संचालनमा ल्याउन स्वतन्त्र विद्यार्थी युनियन(स्ववियु) सक्रिय भएको छ।
छात्रावास संचालनमा रहेको समस्याहरु समाधानको लागि शनिबार उनीहरूले राष्ट्रिय सभा सदस्य मृगेन्द्र कुमार सिंह यादव तथा मधेश प्रदेशको शिक्षा तथा समाज कल्याण मन्त्री महेश कुमार यादवको उपस्थितिमा छलफल गरेको छ ।
छलफलमा जिल्ला समन्वय समिति मार्फत सरोकारवालाको बैठक अविलम्व बोलाउन अनुरोध गर्ने तथा छात्रावास सम्बन्धमा गठित छानबिन समितिलाई सक्रिय गराई अविलम्व जिल्ला समन्वय समितिमा प्रतिवेदन पेश गर्न लगाउने निर्णय गरिएको मविब क्यामपसको स्ववियु सभापति रंजित यादवले जानकारी दिए ।
उक्त बैठकमा राजविराज वडा नं५ का वडा अध्यक्ष बन्धु लाल दास, मविब क्याम्पस प्रमुख राजिव मिश्र, जसपा नेपाल सप्तरीका जिल्ला अध्यक्ष केदार यादव, स्ववियु सभापती रन्जित यादव, स्ववियु सदस्यहरू अनिल यादव, बिनय यादव ,प्रतीक्षा यादव, युवा नेता किशोर यादव ,स्थानीय बुद्धिजिवि प्रयाग यादव,सुर्य नारायण यादव र अन्य विशिष्ट ब्यक्तिहरुको उपस्थिति रहेको जनाइएको छ । उनीहरूले छात्रावास भवनको निरिक्षण समेत गरेका छन् ।
भारतीय दुतावासको सहयोगमा तत्कालीन जिल्ला विकास समिति सप्तरी मार्फत ०६२सालमै स्थानीय शेखर कुमार सिंह(हाल राष्ट्रिय सभा सदस्य) नेतृत्वको निर्माण समितिले काम थालिएको थियो । यद्यपी अहिलेसम्म उक्त काम पुरा हुनसकेको छैन् ।
