क्रान्ति केन्द्र सम्वाददाता
राजविराज । नेपाल क्रिकेट संघ (क्यान)को केन्द्रीय सदस्यमा राजविराज निवासी आयुष श्रेष्ठ विजयी भएको छ ।
शनिबार क्यानको निर्वाचनमा कुल खसेको ८५ मत मध्ये श्रेष्ठ ५१ मत ल्याई बिजयी भएको हो । खुल्लाबाट केन्द्रिय सदस्यमा ५ जना रहने प्रावधान रहेको छ ।
उनी सप्तरी क्रीकेट संघका अध्यक्ष तथा मधेस प्रदेश क्रीकेट संघका सचिव समेत रहेका हुन् ।
त्यस्तै, सचिवमा नेपाली क्रिकेट टिमका पूर्व कप्तान पारस खड्का निर्वाचित भएका छन् ।
क्यानका अध्यक्षमा चतुरबहादुर चन्द, उपाध्यक्षमा रोशनकुमार सिंह र कोषाध्यक्षमा पदमबहादुर खड्का निर्विरोध निर्वाचित भइसकेका छन् ।शनिबार भएको मतदानमा निवर्तमान कार्यवाहक सचिव प्रशान्तबिक्रम मल्ललाई पराजित गर्दै पारस खड्का निर्वाचित भएका छन् । कुल ८५ मतदाता रहेकामा पारसले ४८ र प्रशान्तले ३७ मत पाए ।पारस क्यानको बागमती प्रदेश क्रिकेट संघको पनि अध्यक्ष हुन् ।
त्यस्तै महिला सदस्यमा जयन्तीदेवी भट्ट, कर्णालीबाट प्रतिनिधित्व गर्ने सदस्यमा श्रीधर केसी र लुम्बिनीबाट प्रदीप मजगैया निर्विरोध चयन भएका छन् ।
अरु पाँच प्रदेशबाट प्रतिनिधित्व गर्ने एक/ एक जना सदस्य र खुला ५ जना सदस्यका लागि पनि चुनाव भएको थियो ।
जसमा कोशीबाट अर्जुन पौडेल ४७ मत प्राप्त गर्दै विजयी भए । मधेश प्रदेशबाट माधव कुमार कर्मचार्य र मोहम्मद दाउद अन्सारीको भोट ४२ बराबर हुँदा गोला प्रथाबाट माधवकुमार कर्मचार्य विजयी भए ।
गण्डकीबाट सुदीप शर्मा ५२ मतसहित विजयी भए भन्ने बागमतीमा दिवाकर घलेले ४६ मत ल्याएर विजयी भए । सुदुरपश्चिमबाट विक्रम विष्ट ४९ भोट प्राप्त गर्दै विजयी भए ।
खुल्ला सदस्यमा धीरेन्द्र साउद ५९, दुर्गाराज पाठक ५४, वीरेन्द्र चन्द ३४ मत ल्याएर निर्वाचित भए । करण महतरा क्षेत्री र ऋषिराम गौतमले बराबर २६ मत पाएका थिए र गोला प्रथा गर्दा करण चुनिएका छन् ।
