‘असोज ३’ गते नेपालको लागि ऐतिहासिक दिन हो । २०७२ साल आजकै दिन नेपालले संविधान पाएको थियो ।
पहिलो संविधान सभाले तोकिएको समयमा संविधान दिन असफल भएपछि यसको म्याद चार वर्षको लागि थपिएको थियो । चार वर्ष पश्चात वि.स. २०६९ जेठ १५ गते संविधानको मस्यौदा तयार पार्न असफल भएकाले पहिलो संविधानसभा भंग भयो । त्यसपछि २०७० मंसिर ४ गते दोश्रो संबिधान सभाको सदस्यहरूको निर्वाचन भयो । अन्तत: २०७२ असोज ३ गते संविधान सभाबाट नेपालको संविधान २०७२ जारी भयो । नेपालको संविधान २०७२ नामकरण गरिएको उक्त संविधान निर्माण पहिला थुप्रै राजनीतिक उतार चढाव राज्यले देखे । संविधान निर्माण भएपछि मधेशका मुद्दाहरु सम्बोधन नभएको भन्दै मुलुक संविधानप्रति दुई भागमा बाँडिए । मधेशवादी दलहरुले संविधानमा आफ्ना मुद्दा सम्बोधनका लागि आन्दोलन घोषणा गरे । जुन आन्दोलनमा कतिपयले शहादत प्राप्त गरे ।
त्यो दिनदेखि संविधान अधुरो रहेको भन्दै अहिले पनि मुलुकमा दुई समुह देखिन्छ । एकले ‘असोज ३’मा संविधान दिवसको रूपमा उत्सव मनाउँछन् भने अर्कोले यसलाई कालो दिन भन्दै विरोध जनाउँछ । ८ बर्षदेखि यसरी नै चलिरहेको छ । यद्यपी यसको निराकारण हुन सकेको छैन् । राज्यमा यस्तो अवस्था एकदमै चिन्ताजनक हो । यसको समाधान हुनुपर्छ ।
