क्रान्ति केन्द्र सम्वाददाता
काठमाडौँ । देशैभरका शिक्षकहरूले बुधबारदेखि काठमाडौंमा आन्दोलन थालेका छन् । सरकारले गत भदौ २७ गते ल्याएको विद्यालय शिक्षा सम्बन्धी विधेयकको केही बुँदामा असन्तुष्टि जनाउँदै आएका छन् ।
संसद्मा दर्ता भएको उक्त विधेयकमा शिक्षकलाई पालिकामातहत राख्ने व्यवस्था गरेको छ ।
संविधानअनुसार शिक्षा विधेयकमा शिक्षकको सरुवा, बढुवा, नियुक्ति कार्यसम्पादन, सेवासुविधा, नियमनलगायत रेखदेखमा स्थानीय तहको भूमिका रहने व्यवस्थाप्रति असन्तुष्टि जनाउँदै नेपाल शिक्षक महासंघले आन्दोलनको घोषणा गरेको हो ।
महासंघले शिक्षकका पेसागत सुरक्षा, हकहित र सम्मानको माग राख्दै विद्यालय बन्द गरी आन्दोलन सुरु गरेको छ।
शिक्षा, विज्ञान तथा प्रविधि मन्त्रालयले मंगलबार ३ बजे शिक्षामन्त्री अशोककुमार राईको नेतृत्वमा हुने वार्तामा सहभागी हुन महासंघलाई आग्रह गरेको थियो । यद्यपी महासंघले भने वार्तामा सहभागी नभई मंगलबार नै केन्द्रीय समितिको बैठक राखेर सडक आन्दोलनलाई सशक्त बनाउने निर्णय गरेको थियो । सरकारले वार्तामा बस्न पटक–पटक गरेको आग्रहलाई अस्वीकार गर्दै उनीहरु बुधबारदेखि आन्दोलनमा उत्रेका छन् ।
उता सडकमा आन्दोलन गर्न उत्रेका शिक्षकहरूको भीडले काठमाडौंको ट्राफिक व्यवस्था अस्तव्यस्त बनेको छ ।
