क्रान्ति केन्द्र सम्वाददाता
राजविराज । भारतीय नम्बर प्लेटको मोटरसाइकललाई सप्तरीका प्रहरी प्रशासनले अनावश्यक दुःख दिएको भन्दै जसपा सप्तरीले सप्तरीका सिडिओलाई ध्यानाकर्षण गराएका छन् ।
जसपा सप्तरीका अध्यक्ष केदार प्रसाद यादवको नेतृत्वमा एक टोलीले शुक्रबार सिडिओलाई ज्ञापन पत्र बुझाउँदै भारतीय मोटरसाइकललाई सहज रुपमा संचालन गर्ने बाताबरण मिलाउन माग गरेको छ ।
‘पछिल्लो समयमा सप्तरीका प्रहरी प्रशासनले भारतीय नम्बर प्लेटका मोटरसाइकल नेपाल प्रवेशमा रोक लगाउने र नियन्त्रणमा लिएर भन्सार कार्यालयमा जिम्मा लगाई लिलाम गर्ने जस्ता अनावश्यक दु:ख दिएको विषयप्रति हाम्रो गम्भिर ध्यानाकर्षण भएको छ,’ ज्ञापन पत्रमा भनिएको छ, ‘यस घटनाले सदियौदेखि नेपाल र भारत विचको गहिरो सम्बन्धलाई चिस्याउने तथा एक आपसको रोटीबेटिको सम्बन्धमा आँच आएको हाम्रो ठहर छ, नेपालमा रहेका आफन्तजनलाई भेट्न आउने क्रममा हुने यस्तो बर्बरतापूर्ण व्यवहारले दुई मित्र राष्ट्र विचको मैत्रीपुर्ण सम्बन्धमा ठाडो चुनौती दिएको छ ।’
जसपा सप्तरीले मोटरसाइकलको सहज प्रवेशका लागि पास लिने स्थानको विस्तार गर्न समेत माग गरेको छ । ‘भन्सार काटेर नेपाल प्रवेश गर्ने व्यवस्थाको प्रभवकारी कार्यान्वयन गर्न र भारतीय मोटरसाइकललाई सहज रुममा आफुले लिएको अनुमतिको आधारमा निर्बाध रूपमा संचालन गर्ने बाताबरण मिलाउन सम्बन्धित पक्षको ध्यानाकर्षण गराउँदछौं । साथै भारतबाट नेपाल प्रबेश गर्ने सबै नाकाहरुमा मोटरसाइकलको पासलिने व्यवस्था मिलाउन यसै ज्ञापन पत्र मार्फत आग्रह गर्दछौं,’ पत्रमा भनिएको छ ।
ज्ञापन पत्र बुझ्दै सप्तरीका सिडिओे किरण थापाले समस्या समाधानको लागि आफ्नो स्तरबाट हुनसक्ने काम गर्ने बताए ।
