क्रान्ति केन्द्र सम्वाददाता
राजविराज । सप्तरीका प्रमुख जिल्ला अधिकारी किरण थापाले जिल्लाको समस्या समाधानको लागि उद्योग व्यवसायी, निर्माण व्यवसायी, नागरिक समाज, पत्रकार लगायतकासँगै मिलेरै अगाडि बढ्ने बताएका छन् ।
उद्योग वाणिज्य संघ सप्तरीले शुक्रबार आयोजना गरेको नव आगन्तुक सिडिओ, अनुसन्धानका उपनिर्देशक, आर्मीका गणपतिको स्वागत तथा अभिवादन कार्यक्रमलाई सम्बोधन गर्दै उनले यस्तो बताएका हुन् ।
उनले कार्यक्रममा वक्ताहरुले व्यक्त गरेका जिल्लाका समस्याहरुमा मनन गरेर काम गर्ने बाचा गरे । उनले कानुन उल्लघंन गर्न जोकोहीलाई पनि कारबाही गर्ने समेत बताए ।
कार्यक्रममा उद्योग वाणिज्य संघ सप्तरीका अध्यक्ष लालु प्रसाद अग्रवाललेबखुला सीमा नाकामा भइरहेको चोरी तस्करीका कारण व्यवसाय खस्किदै गएको बताए । उनले भने खस्किदो व्यपार र बढ्दो ब्याजदरका कारण घरभाडा तिर्ने र कर्माचारी राख्न सक्ने अवस्था समेत नरहेको बताए ।
नेपाल उद्योग वाणिज्य महासंघका केन्द्रीय सदस्य अरुण कुमार प्रधानले प्रशासकले सप्तरीलाई हेर्ने दृष्टिकोण परिवर्तन गर्न आग्रह गरेका छन् ।
‘इतिहासले प्रशासकहरु पहिला नै सप्तरीको बारेमा नकारात्मक सोचेर आएको देखाउँछ, यो हेर्ने दृष्टिकोण परिवर्तन गर्नुपर्छ,’ उनले भने, ‘यहाँका बासिन्दा जति सरल छ त्यति कतै छैन् ।’
उनले मिटर ब्याज सम्वन्धी बनेको ऐनमा ऋण लिएको कति बर्षसम्म मुदा दिन सक्ने व्यवस्था नभएकोले समस्या बढेको बताए ।
‘ऐनमा कति पहिला सम्म ऋण लिएकाहरुले निवेदन दिन सक्ने स्पष्ट व्यवस्था छैन् , १० वर्ष २० बर्ष, ५० बर्ष तोक्नु पर्छ, समयको लिमिट हुनुपर्छ,’ उनले भने, ‘मेरो बुबा बाजेको समयमा ऋण लिएकाहरुले पनि निवेदन दिइरहेको छ, अब म जस्तो व्यवासाय गर्ने मान्छे दैनिक जिल्ला प्रशासन कार्यालयमा तारेख लिनगए हाम्रो व्यवसाय कसरी चल्छ, हाम्रो ऋण कसले तिर दिन्छ ।’
कार्यक्रममा नागरिक समाजका अगुवा थान सिंह भन्साली, पत्रकार महासंघ सप्तरीका अध्यक्ष श्रवण देव लगायतकाले मन्तव्य राखे । -क्रान्ति केन्द्र दैनिक पत्रिका
