क्रान्ति केन्द्र सम्वाददाता
राजविराज । सप्तरीको विष्णुपुर गाउँपालिकाका अध्यक्ष उमेश प्रसाद यादव पदबाट निलम्बित भएका छन् ।
घुससम्बन्धी प्रकरणमा अध्यक्ष यादवलाई आयोगले नियन्त्रणमा लिएर विशेष अदालतबाट म्याद थप गरी थुनामा राखेसँगै उनी निलम्बित भएका हुन् ।
अख्तियार दुरुपयोग अनुसन्धान आयोगले विष्णुपुर गाउँपालिकालाई पत्राचार गर्दै भदौ ६ गतेदेखि लागुहुने गरी अध्यक्ष यादव निलम्बनमा परेको जानकारी गराएको हो ।
अख्तियार दुरुपयोग अनुसन्धान आयोगले भ्रष्टाचार मुद्दामा अनुसन्धानको लागि बिशेष अदालतबाट म्याद थप गराएर राखेपछि सार्वजनिक पद धारण गरेका व्यक्ति अनुसन्धान सम्पन्न नभएसम्म निलम्बित रहने कानुनी प्रावधान छ ।
अख्तियार दुरुपयोग अनुसन्धान आयोग ऐन २०४८को दफा १७मा लेखिएको छ, ‘सार्वजनिक पद धारण गरेको कुनै व्यक्तिलाई आयोगले दफा १६ वा दफा १९ को उपदफा (४) बमोजिम थुनामा राखेकोमा त्यसरी थुनामा राखेको अवधिभर र दफा १८ बमोजिम मुद्दा चलेकोमा सो मुद्दाको किनारा नभएसम्मको अवधिभर त्यस्तो व्यक्ति आफ्नो पदबाट स्वतः निलम्बन भएको मानिनेछ । त्यसरी निलम्बनमा रहेको व्यक्तिले कुनै सरकारी कार्यालय वा सार्वजनिक संस्थामा वा नेपाल सरकारलाई कुनै किसिमले प्राप्त ऋण वा अनुदान रकममा व्ययभार पर्ने पदमा कुनै पनि किसिमले काम गर्न पाउने छैन् ।’
घुस सम्बन्धी विषयमा सोधपुछ र अनुसन्धानका लागि पालिका अध्यक्ष यादवलाई भदौ ६ गते बुधबार साँझ अख्तियारले नियन्त्रणमा लिएको थियो । गत साउन ३१ गते सोलार सम्बन्धी एक योजनामा विष्णुपुर गाउँपालिकाका लेखापाल टेकनारायण यादव र कम्प्यूटर अपरेटर वीरेन्द्र यादवलाई घुसवापत २ लाख नगद र ३ लाखको चेक लिँदैगर्दा आयोगको टोलीले राजविराजस्थित गजेन्द्र चौकबाट नियन्त्रणमा लिएको थियो ।
अख्तियारको कारबाहीमा परी निलम्बन हुने यादव सप्तरीका तेश्रो पालिका प्रमुख हुन् ।
यसअघि राजविराज नगरपालिकाका निर्वाचित नगरप्रमुख भिमराज यादवमाथि विशेष अदालतमा आरोपपत्र दायर गरेपछि भिमराज निलम्बित भएका थिए । उनलाई विशेष अदालतले दोषी ठहर गरेको छ ।
घुस सम्बन्धी प्रकरणमा शम्भुनाथ नगरपालिकाका नगरप्रमुख जितेन्द्र प्रसाद गुप्ताउपर अख्तियारले विशेष अदालतमा आरोपपत्र दायर गरेपछि उनी निलम्बित छन् । उनको मुद्दा विशेष अदालतमा चलिरहेको छ ।
