क्रान्ति केन्द्र सम्वाददाता
राजविराज । पत्रकार सौरभ यादवमाथि शुक्रवार राति राजविराज नगरपालिका-२ राजदेवी टोलमा भएको कुटपिटको घटनामा दुईपक्षबिच मिलापत्र भएको छ । कुटपिटमा संलग्न भएका व्यक्तिहरूले आत्मआलोचना गरेपछि मंगलबार राजविराजस्थित नेपाल पत्रकार महासंघ शाखा सप्तरीको कार्यालयमा दुईपक्षबिच मिलापत्र भएको महासंघ सप्तरीका सचिव रामनारायण विश्वासले एक विज्ञप्ति जारी गर्दै जानकारी दिएका छन् ।
‘कुटपिटमा संलग्न भएकाहरुको परिवारको आग्रहमा महासंघले पहलकदमी लिंदै कुटपिटमा संलग्न स्थानीय बब्बु भनिने आलोककुमार यादव र लड्डु यादवले त्रुटीपूर्ण उक्त घटना भएको भन्दै आत्मालोचना गर्दै आगामी दिनमा पत्रकार सौरभ यादवसँग एक आपसमा भाइचारा सम्बन्ध राख्दै यस्ता घटना नदोहोरिने भनि प्रतिबद्धताकासाथ पत्रकार महासंघका पदाधिकारी तथा अभिभावकहरुको रोहवरमा मिलापत्र भएको जानकारी गराउँदछु,’ विज्ञप्तिमा भनिएको छ ।
साथै समाचारको विषयलाई लिएर कसैलाई कुनै किसिमको गुनासो भएको खण्डमा पत्रकारमाथि आक्रमण गर्नुको साटो आवश्यक प्रमाणसहित कानून बमोजिम सम्बन्धित सञ्चारमाध्यममा खण्डनकालागि पत्राचार गर्न र थप प्रक्रियाकालागि नियामक निकाय प्रेस काउन्सिलसमक्ष पुग्न समेत सम्पूर्ण सरोकारवालामा पत्रकार महासंघ सप्तरी शाखाले आग्रह गरेको छ ।
समाचारको बिषय लिएर पत्रकार सौरभलाई शुक्रबार मध्य रातिमा राजविराजको राजदेवी चौकमा बोलाएर आलोक र लड्डुले हातपात गरेका थिए । हातपातमा सौरभको छातिमा चोट लागेर उनी घाइते भएका थिए ।
