क्रान्ति केन्द्र सम्वाददाता
जिल्ला प्रशासन कार्यालय सप्तरीले पत्रकारलाई प्रशासन कार्यालयको अनुमति बिना फोटो, भिडियो नखिच्न बुधबार सूचना जारी गरेपछि सप्तरीका पत्रकारहरु बिहीबारदेखि आन्दोलित बनेका छन् ।
सप्तरीका सहायक प्रमुख जिल्ला अधिकारी लेवन काश्यप अधिकारीले बुधबार बिना अनुमति प्रशासन कार्यालय परिसरको फोटो, भिडियो खिची समाजिक सञ्जाल, अनलाइन तथा पत्रपत्रिकामा राखे कानुनी कारबाही गर्ने सूचना जारी गरेको थियो ।
प्रशासन कार्यालय सप्तरीको उक्त सूचना संविधानप्रदत पूर्ण प्रेस स्वतन्त्रताको ग्यारेन्टीविरुद्ध भएको ठहर गर्दै नेपाल पत्रकार महासंघ सप्तरीको अगुवाईमा सप्तरीका पत्रकारहरुले बिहीबारदेखि आन्दोलन थालेको हो ।
आन्दोलित पत्रकारहरुले प्रेस स्वतन्त्रताको ग्यारेन्टी, सिडिओको उर्दी फिर्तासहितका मागसहित बिहिबार राजविराजमा प्रदर्शन गरेका छन् । उनीहरू महासंघको शाखा कार्यालय अगाडिबाट र्याली लिएर राजविराज नगरका विभिन्न भागको परिक्रमा गर्दै जिल्ला प्रशासन कार्यालयको मूल गेट अगाडि एक घण्टा धर्ना बसेका थिए ।
यसबिच जिल्ला प्रशासन कार्यालयले एक सुचना जारी गर्दै बुधबार भिडियो, फोटो नखिच्न सम्बन्धि जारी गरेको सुचना स्थगन गरि पत्रकारहरुलाई वार्तको लागि बोलाएको छ । यद्यपी आन्दोलित पत्रकार उर्दीको शैलीमा जारी गरिएको सुचना फिर्ता नगरेसम्म वार्तामा नजाने निर्णयमा तटस्थ रहेको जनाइएको छ ।
