क्रान्ति केन्द्र सम्वाददाता
नेपाल पत्रकार महासंघ शाखा सप्तरीले जिल्ला प्रशासन कार्यालय सप्तरीको सुचनाउपर एक्सन लिएको छ ।
महासंघले एक विज्ञप्ति जारी गर्दै प्रशासन कार्यालयको फोटो-भिडियो खिच्न र पत्र-पत्रिका तथा अनलाईनमा प्रकाशन गर्न रोक लगाएको विषयप्रति गम्भिर ध्यानाकर्षण भएको बताएको छ ।
महासंघले संविधान र प्रेस स्वतन्त्रता विपरितको उक्त उर्दीपूर्ण सूचना आज राती ८ बजेसम्म फिर्ता लिई पूर्ण प्रेस स्वतन्त्रता र पत्रकार सुरक्षाको ग्यारेन्टी गर्न माग गरेको छ । सुचना फिर्ता नलिए बिहीवारदेखि चरणबद्ध आन्दोलनमा उत्रिने चेतावनी समेत दिएको छ ।
आज जिल्ला प्रशासन कार्यालय, सप्तरीले कार्यालय परिसरमा फोटो, भिडियो नखिच्न सुचना जारी गरेको छ ।
कार्यालयले सूचना जारी गरी पत्रकार, सर्वसाधारणले बिना अनुमति फोटो, भिडियो खिची सामाजिक संजाल, अनलाइन, पत्र–पत्रिकामा राखेको पाइएको भन्दै फोटो र भिडियो नखिच्न सुचना जारी गरेको जनाइएको छ ।
सहायक प्रमुख जिल्ला अधिकारी लेबन काश्यप अधिकारीले जारी गरेको सूचनामा कार्यालयमा सेवा लिन आउने सेवाग्राही, पत्रकार, सर्वसाधारणले बिना अनुमति यस कार्यालय परिसरभित्रको फोटो, भिडियो खिची सामाजिक संजाल, अनलाइन, पत्र पत्रिकामा राखेको पाइएकोले कर्मचारीको ब्यक्तिगत गोपनियताको हक र कार्यालयको सुरक्षा संबेदनसिलताका कारण आदेशानुसार यो सूचना जारी गरिएको उल्लेख छ ।
सूचनाको विपरीत गतिविधि गरे/गराइएको पाइएमा प्रचलित कानुन बमोजिम कार्वाही हुने चेतावनी पनि दिइएको छ ।
नेपालको संविधानको प्रस्तावनामै पूर्ण प्रेस स्वतन्त्रताको ग्यारेन्टी गरिएपनि जिल्ला प्रशासन कार्यालय सप्तरीको जारी सूचना त्यसका विपरित ‘शाही कालिन उर्दी’ जस्तै रहेको महासंघको ठहर छ ।
