क्रान्ति केन्द्र सम्वाददाता
अधिवक्ता भगवती पाण्डेले दिएको अभिव्यक्तिविरुद्ध तामाङ र मगर समुदायले राजविराजमा विरोध प्रदर्शन गरेका छन् ।
सोमबार राजविराजको शिव मन्दिरबाट निस्केका उनीहरू विरोध प्रदर्शन गर्दै जिल्ला प्रशासन कार्यालय सप्तरी अगाडि एक घण्टा धर्नामा बसे ।
एउटा टिभी अन्तरवार्तामा अधिवक्ता पाण्डेले तामाङ र मगरको विवाहको प्रसंगमा दिएको अभिव्यक्तिको विरोध स्वरुप आन्दोलनमा उत्रिएको नेपाल मगर संघ सप्तरीकी अध्यक्ष साधना राना मगरले बताईन ।
पाण्डेले प्राइम टिभीमा प्रसारित अन्तर्वार्तामा मुस्लिम, मगर, तामाङ लगायत समुदायको विवाह संस्कारलाई लिएर गरेको टिप्पणीले आफुहरुको आत्मसम्मानमा गम्भीर चोट पुगेको उनले बताइन् । अधिवक्ता पाण्डेको अभिव्यक्तिप्रती आपत्ति जनाउदै उनले उनिमाथि हदैसम्म कारबाहीको माग गरिन ।
आन्दोलित बनेका तामाङ र मगर समुदायले प्रमुख जिल्ला अधिकारी भुपेन्द्र थापा मार्फत ३ सुत्रिय माग राख्दै गृहमन्त्रीलाई ज्ञापनपत्र समेत बुझाएका छन् ।
अधिवक्ता पाण्डेमाथि हदैसम्मको कानुनी कारबाही गर्न, आन्दोलनमा सक्रिय रहेका सामाजिक अभियन्ताहरुमाथी प्रहरीद्वारा गरिएको बर्बरतापुर्ण दमनमा घाइते अभियन्ताहरुलाई क्षतिपूर्तिसहित उपचारको व्यवस्था मिलाउन र यातना दिने प्रहरीमाथी कडा कारबाहीको माग गरे ।
