श्रवण वत्स
राजविराज । सप्तरीमा केहीदिनदेखी पानी नपर्दा भएको अत्यधिक गर्मीले सर्वसाधारणलाई ज्यान जोगाउनै कठिनाई भएको छ ।
अत्यधिक गर्मीले गर्दा सर्वसाधारणलाई चुल्होमा खाना पकाउन समेत कठिनाई भईरहेको स्थानीयहरुले बताउँछन । दैनिकी मजदुरी गरी खाने मध्यमवर्गीहरुलाई घर बाहिर कामकाज गर्न कठिनाई भईरहेको मजदुरहरुले बताउँछन । सप्तरीमा हरेक दिन बढिरहेको तापक्रमले स्थानीयहरुको जनजीवन कष्टकर बन्दै गएको छ ।
बिहानैदेखि बढेको तापक्रमको असर मध्ये राति सम्म रहने गरेको छ ।
दैनिक मजदुरी गर्ने, रिक्सा, ठेला चलाएर जीविका धान्दै आएकालाई त गर्मीले दोहोरो मारमा पारेको छ । पानी नपर्दा किसानहरुलाई समेत समस्याको खेपिरहनु परेको किसानहरु बताउँछन् ।
गर्मी बढेसँगै बिरामी पर्नेको संख्यामा पनि वृद्धि भएको छ । अस्पतालहरूमा गर्मीका कारण हुने गरेको समस्याले बिरामीको चाप बढेको छ । टाउको दुख्ने, डाईरिया, रुघाखोकी तथा ज्वरोलगायतका संक्रमणको समस्या लिएर आउनेको संख्या बढेको प्रादेशिक अस्पतालका मेडिकल सुपरिन्टेन्डेन्ट नवलकिशोर झाले बताए ।
गजेन्द्र नारायण सिंह अस्पतालका मेडिकल सुपरिटेन्डेन्ट प्रकाश साहले अषाढ महिनाको तुलनामा अस्पतालमा बिरामीको संख्या ह्वात्तै बढेकोे बताए । उनले विरामीमा अहिले २० देखि ३० प्रतिशत बृद्धि भएको बताए ।
उच्च ज्वरोको विरामी, झाडापखाला, सर्पदंशको विरामीको संख्या वृद्धि भएको भन्दै दैनिक रुपमा विरामीको चाप बढदै जाँदा आकस्मिक कक्षमा विरामीलाई बेड भन्दा तल राखेर समेत उपचार गर्नुपरेको उनले बताए । उनले एक दर्जन भन्दा बढी डेङ्गुको बिरामीहरु समेत आएको जानकारी दिए ।
उनले डेंगु रोगबाट जोगिन सर्वसाधारणलाई आफ्नो घरको वरिपरी सरसफाई राख्न, लामखुट्टे बिहान र बेलुकाको समयमा बढी टोक्ने भएकोले लामखुट्टेबाट बच्नको लागि शरिर ढाक्नेगरी लुगा लगाउन र राति सुत्नबेला दैनिक रुपमा झुल लगाएर सुत्न सबैलाई आग्रह गरेका छन् ।
