क्रान्ति केन्द्र सम्वाददाता
अथक मानव अधिकार योद्धा प्रकाश काफ्लेको ३१ औं स्मृति दिवसको अवसरमा राजविराजमा आयोजित कार्यक्रममा ८ औं बैद्य-प्रकाश मानव अधिकार पुरस्कारबाट थान सिंह भन्साली सम्मानित भएका छन् ।
वैद्य प्रकाश पुरस्कार मानवअधिकार कोषले मंगलबार आयोजना गरेको उक्त कार्यक्रममा मैथिली साहित्य परिषद्को समन्वयमा स्वर्गिय उर्मिलादेवी झा मैथिली गित गायन पुरस्कार कंचन झालाई प्रदान गरिएको छ ।
दुवै पुरस्कारका संस्थापक पत्रकार महासंघ सप्तरीका पुर्व अध्यक्ष पत्रकार स्वतन्त्रता सेनानी वैद्यानाथ झा हुन् ।
उनकै अध्यक्षतामा आयोजित उक्त कार्यक्रमका प्रमुख अतिथि मानवअधिकार आयोगको सदस्य मिहिर ठाकुरले दुवैजनालाई पुरस्कार हस्तान्तरण गरे ।
सामाजिक काममा सधैं सक्रिय रहेको थान सिंह र मैथिली गित गायनमा सक्रिय रहेकोले कंचनलाई उक्त पुरस्कार प्रदान गरिएको जनाइएको छ ।
मानवअधिकारकर्मी तथा पत्रकार मनोहर पोखरेलले संचालन गरेको उक्त कार्यक्रममा राजविराज नगरपालिकाकी कार्यबाहक नगर प्रमुख इसरत परविन, अधिकारकर्मी, पत्रकार, स्थानीय लगायतका व्यक्तिहरुको उपस्थिति रह्यो ।
