क्रान्ति केन्द्र सम्वाददाता
नेपाल पत्रकार महासंघ शाखा सप्तरीका सल्लाहकार मनोहरकुमार पोखरेललाई जिल्ला प्रहरी कार्यालय सप्तरीमा कार्यरत प्रहरी सहायक निरीक्षक (असई) राजेश्वर महताेले कुटपिट गरेका छन् ।
सोमबार जिल्ला प्रहरी कार्यालय पुगेका पत्रकार पोखरेललाई असई महतोले कुटपिट गरेका हुन् । जिल्ला प्रहरीको मुद्दा शाखामा जर्बजस्तीकरणी गर्भपतन सम्बन्धी मुद्दा प्रहरीले दर्ता गर्न नमानेको भनि पीडित पक्षको गुनासोको आधारमा सोही विषयमा जानकारी लिन खोज्दा आफुमाथि असई महतोले दुब्र्यवहार गर्दै कुटपिट गरेको पोखरेलले बताए । कुटपिटबाट घाईते भएका पत्रकार पोखरेलको राजविराजस्थित गजेन्द्रनारायण सिंह अस्पतालमा उपचार भईरहेको छ ।
मानव अधिकार्मी समेत रहेका पोखरेललाई कुटिएको घटना बाहिरिएपछि विभिन्न संघ संस्था तथा व्यक्तिहरुले त्यसको भर्त्सना गर्न थालेका छन् ।
पत्रकार महासंघ शाखा सप्तरीले एक विज्ञप्ति जारी गर्दै उक्त घटनाको भर्त्सना गरेका छन् ।
घटनाबारे जानकारी पाएर नेपाल पत्रकार महासंघका एक टोली जिल्ला प्रहरी कार्यालय सप्तरी पुगेर प्रहरी प्रमुख एसपी नरेन्द्र कार्कीलाई पत्रकार पोखरेलमाथि कुटपिट गर्ने असई महतोमाथि कारबाही गर्न माग गरेका छन् ।
प्रहरी प्रमुख एसपी कार्कीले जिल्ला प्रहरीको तर्फबाट क्षमायाचना गर्दै कुटपिट गर्ने असई महतोमाथि कानून बमोजिम तीन दिनभित्र कारबाही गर्ने प्रतिबद्धता गरेका छन् ।
टोली नेतृत्वकर्ता महासंघका सचिव आरएन विश्वासले तीन दिनभित्र पत्रकार पोखरेलमाथि कुटपिट गर्ने असईमाथि कारबाही नगरिए महासंघ संघर्षमा उत्रिने चेतावनी दिएका छन् ।
उक्त घटनाको विरोधमा पत्रकार माथिको दमन बन्द गर भन्दै राष्ट्रिय युवा संघ नेपाल सप्तरीले सोमबार साँझ राजविराजमा प्रदर्शन गरेका छन् । उनीहरूले दोषीमाथि कारवाहीको माग गरेका छन् ।
