क्रान्ति केन्द्र सम्वाददाता
उपचारको क्रममा एक युवकको मृत्यु भएपछि सप्तरीको कञ्चनरुप नगरपालिकाको कञ्चनपुर नगर अस्पतालमा तोडफोड भएको छ ।
सप्तरीको सप्तकोशी नगरपालिका वडा नम्बर ९ का रामदेव खंगको १६ बर्षीय छोरा ओम प्रकाश खंग उपचारकाको क्रममा मृत्यु भएपछि आक्रोशित आफन्तजनले सोमबार अस्पतालमा तोडफोड गरेको हो ।
ज्वरो आएको खंगलाई उपचारको लागी आइतबार बिहान ११ बजे तिर अस्पतालमा भर्ना गरिएको थियो । अस्पतालले साढे ४ बजे मृत्यु भएको घोषणा गरेको थियो ।
यस सम्बन्धमा कंचनरुप नगरपालिकाका प्रमुख ललन प्रसाद गुप्तालाई पटकपटक सम्पर्क गरि अस्पतालमा आउन आग्रह गर्दा नआएपछि प्रदर्शनकारीहरुले कंचनरुप नगरपालिकामा समेत तालाबन्दी गरेको जनाइएको छ ।
मृतकका आफान्तले सोमबार विहानैदेखि नारावाजी गर्दै अस्पतालमा ढुङ्गामुढा प्रहार गरेका थिए । स्थितिलाई नियन्त्रणमा लिन प्रहरीले अश्रुग्यास प्रहार गरेको थियो । अहिले स्थिति नियन्त्रणमा रहेको प्रहरीले जनाएको छ ।
अस्पताल प्रशासनले भने मृत्युको कारण हालसम्म सार्वजनिक गरेका छैनन् ।
