क्रान्ति केन्द्र सम्वाददाता
राजविराज । मधेश प्रदेशकी प्रदेश सभा सदस्य माला कर्णले आर्थिक वर्ष २०७९/०८० को संसदीय कोषको खर्च सार्वजनिक गरेकी छिन् ।
कर्णले बुधबार राजविराजमा पत्रकार सम्मेलन गर्दै आफ्ना संसदीय विकास काेष मार्फत प्राप्त गरेको ९५ लाख रुपैयाँ र प्रशासनिकतर्फ प्राप्त गरेको ५ लाख रकमको खर्च सार्वजनिक गरेकी हुन् ।
उनले सार्वजनिक गरेकी खर्च विवरणमा ४० लाखको लागतमा खडक नगरपालिका-६ स्थित खडक बहुमुखी क्याम्पसको भवन निर्माण, ५ लाखको लागतमा छिन्नमस्ता गाउँपालिका-६ कुपहीस्थित पाेखरीमा छठ घाट निर्माण र १५ लाखको लागतमा छिन्नमस्ता गाउँपालिका- ७ हाटीमा पक्की नाला निर्माण गरिएको छ ।
त्यस्तै,साढे १४ लाखमा पुर्व पश्चिम् राजमार्गदेखि खडक नगरपालिका-६ सम्म ग्राभेल सडक निर्माण, ६ लाखमा खड्क नगरपालिका- १० डङराहीमा कल्भर्ट तथा शौचालय निर्माण, ५ लाखमा खडक नगरपालिका-४ मा विश्राम स्थल निर्माण गरिएको उनले जानकारी दिइन् ।
खडक नगरपालिकामा ५ लाखमा मैनबत्ती तालिम र साढे ४ लाखमा ब्युटिसियन तालिम दिइएको सांसद कर्णले बताइन् । उनले प्रशासनिक खर्च ५ लाख भएको बताईन् ।
उनले भनिन, ‘देशको हितमा काम गरि भ्रष्टाचार न्यूनीकरण, स्वस्थ्य राजनीतिक, सार्वजनिकिकरण सबैकाे कर्तव्य रहेकोले आफ्नो सम्पुर्ण कामको खर्च विवरण सार्वजनिक गरेको हुँ ।’ उनले प्रदेश सभा सदस्यको रूपमा पाउँदै आएकी सेवा सुविधा समेत सार्वजनिक गरेकी छिन् ।
माला माओवादी केन्द्रबाट सामानुपातिक प्रदेश सभा सदस्य हुन् ।
