प्रवेश मिश्र
राजविराज । स्थानीय सरकार संचालन ऐन २०७४ अनुसार स्थानीय तहहरुलाई अगामी आर्थिक वर्षको बजेट अषाढ १० गतेसम्म नगर वा गाउँ सभामा प्रस्तुत र अषाढ मसान्त भित्र सभाबाट स्विकृत गर्नुपर्ने हुन्छ ।
यद्यपी सप्तरीका चार स्थानीय तहले पनि यस कानुनको वास्ता नगरेको देखिएको छ । आर्थिक वर्ष २०८०/०८१ सुरु भइसक्दा समेत जिल्लाको राजविराज नगरपालिका, हनुमाननगर कंकालिनी नगरपालिका, कञ्चनरुप नगरपालिका र रुपनी गाउँपालिकले बजेट ल्याउन सकेको छैन् ।
के भन्छन् पालिका प्रमुखहरु ?
कानुनले तोकेको समयमा बजेट ल्याउन नसकिएको कारण बारे बुझ्न खोज्दा रुपनी गाउँपालिका प्रमुख दिनेश यादवले त्रुटि भएको स्विकारे । समयमा बजेट ल्याउन नसक्नु जनप्रतिनिधिको असफलता होइन् ? भन्ने प्रश्नमा उनले भने ‘असफलता भन्दा पनि त्रुटिपुर्ण रहेको हो, आपसी तालमेल नमिल्दा गाउँसभा हुननसकेको हो, हामी तयारीमा छौं एक हप्ताभित्र बजेट सार्वजनिक हुन्छ ।’
अन्य तीन नगरपालिका प्रमुखले भने यस विषयमा जवाफ दिन आलटाल गरे ।
हनुमाननगर कंकालिनी नगरपालिकाका प्रमुख विरेन्द्र माझीसँग आर्थिक वर्ष सुरु भएसक्दा समेत बजेट ल्याउन नसकिएको के कारण होला् ? सोध्दा उनले भने ‘हो नगरसभा हुनसकेको छैन्, समस्या छ ।’
उनलाई समयमा नगरसभा हुननसक्नुको के कारण हो फेरि सोध्दा उनले कारण भन्ने खुलाएनन् । उनले भने,’म बैठकमा छुँ, अहिले कुरा गर्न सक्दिनँ, पछि कुरा गर्छुँ ।’
राजविराज नगरपालिकाका कार्यवाहक नगरप्रमुख इसरत परविन र कञ्चनरुप नगरपालिकाका प्रमुख ललन प्रसाद गुप्तासँग उस्तै प्रश्न गर्दा उनीहरूले यस्तो कुरा फोनमा नगरि कार्यालय आएर बुझ्न भने ।
