क्रान्ति केन्द्र सम्वाददाता
राजविराज । सप्तरीको राजविराजबाट प्रकाशित हुने ‘राजविराज टुडे’ दैनिक पत्रिकको सहयोगमा मातृभूमि प्रतिष्ठान नेपालले हनुमाननगर कंकालिनी नगरपालिका -१स्थित वी.पी. स्मारक पब्लिक माध्यमिक विद्यालयका उत्कृष्ट तीन विद्यार्थीलाई पुरस्कार वितरण गरेको छ ।
राजविराज टुडेको तर्फबाट पत्रिकाको प्रमुख सम्वाददाता धर्मपाल राउतले एक लाख रुपैयाँको चेक मातृभूमि प्रतिष्ठान नेपाल संस्थाका अध्यक्ष सुनिल लोगीलाई प्रदान गरे ।
सोही विद्यालयमा शुक्रबार एक कार्यक्रम आयोजना गरि २०७९को एसईई परिक्षामा सर्वाधिक अंक ल्याएर उत्तीर्ण उक्त विद्यालयका तीन जना विद्यार्थीहरुलाई २५/२५ हजार नगद पुरस्कार प्रदान गरियो ।
पुरस्कार पाउनेमा २.७० जीपीए ल्याउने दिपेश कुमार माझी, २.६५ जीपीए ल्याउने पिंकी कुमारी साह र २.३५ जीपीए ल्याउने दिपा कुमारी मिश्र रहेकी छिन् ।
मातृभूमि प्रतिष्ठान नेपालले संस्थाको अध्यक्ष लोगीको अध्यक्षतामा आयोजना गरेको उक्त पुरस्कार तथा सम्मान कार्यक्रमका प्रमुख अतिथि हनुमाननगर कंकालिनी नगरपालिकाका प्रमुख प्रशासकीय अधिकृत हरिमोहन सुतिहारले उक्त पुरस्कार विद्यार्थीहरुलाई हस्तान्तरण गरे ।
प्रमुख अतिथि सुतिहारले समाजिक काममै लागेको पत्रपत्रिकाले शिक्षामा पनि लगानी गर्नु सराहानीय रहेको बताए । उनले सहयोग गरेकोमा राजविराज टुडेका प्रकाशक शम्भु झाको प्रशंसा गरे ।
कार्यक्रममा विद्यालयका शिक्षक शिवशंकर मंडल, भोगेन्द्र प्रसाद साह, स्थानीय युवा संतोष मंडल लगायतका व्यक्तिहरुको उपस्थिति रह्यो ।
