प्रवेश कुमार बाबुल
सप्तरीका प्रमुख जिल्ला अधिकारी(सिडिओ) भुपेन्द्र थापाले सोमबार राजविराजस्थित अस्पताल र सरकारी कार्यालयहरुमा छडके अनुगमन गरेका छन् । उनले गरेको अनुगमनबाट एक कार्यलय प्रमुखसहित चिकित्सक, स्वास्थ्यकर्मी तथा कर्मचारीहरुसहित ९८ जना कारबाहीमा पर्ने भएका छन् ।
अनुगमनमा घरेलु तथा साना उद्योग कार्यालयका कार्यालय प्रमुख रेखाकुमारी यादव, सूचना अधिकारी कमलनारायण साहसहित ८ जना कर्मचारी अनुपस्थित रहेको देखियो ।
अनुगमनको क्रममा कार्यालय प्रमुख यादव उपस्थित भएपनि असार २२ गतेदेखि उनले हाजिर नै नगरेको पाइएको सिडिओ थापाले बताए । त्यस्तै, सूचना अधिकारी साहले पनि असार ४ गतेपछि हाजिर गरेको छैन् ।
उता गजेन्द्रनारायण सिंह अस्पतालमा १३ जना चिकित्सकसहित ८९ जना हाजिर नरहेका स्वास्थ्यकर्मी तथा कर्मचारीहरु कारबाहीमा परे ।त्यस्तै, साल्ट ट्रेडिङ्ग कर्पोरेशन लिमिटेडमा एक जना कर्मचारी अनुपस्थित रहेको पाइएको उनले बताए ।
अनुपस्थित देखिएका चिकित्सक, स्वास्थ्यकर्मी तथा कर्मचारीहरुसँग पहिलो चरणमा स्पष्टिकरण सोधिने सिडिओ थापाले जानकारी दिए । उनले चित्त बुझ्दो स्पष्टिकरण नआएमा सम्बन्धित कार्यालयमा कारबाहीको लागि सिफारिस गर्ने बताए ।
अनुगमनको क्रममा सिडिओ थापाले सहज रुपमा गुणस्तरीय सेवा प्रवाहको व्यवस्था मिलाउन कार्यालय प्रमुखहरुलाई निर्देशन दिए ।
