क्रान्ति केन्द्र सम्वाददाता
एनआइसी एसिया बैंकको राजविराज शाखामा भएको पौने ३ करोड रुपैयाँको ‘स्क्याम’ प्रकरणमा एकजना पक्राउ गरेका छन्। पुर्जी जारी भएको दुई महिनापछि प्रहरीले आरोपितमध्येका मो. सद्दामलाई प्रहरीले पक्राउ गरेको हो ।
उनलाई राजविराजको एक पसलबाट सोमबार बिहान पक्राउ गरेको सप्तरी प्रहरी प्रमुख प्रहरी उपरीक्षक नरेन्द्रकुमार कार्कीले जानकारी दिए।
जिल्ला सरकारी वकिलको कार्यालयमार्फत दायर भएको सरकारी कागजात किर्ते मुद्दामा सप्तरी जिल्ला अदालतबाट गत वैशाखको दोस्रो साता ९ जनाविरुद्ध पक्राउ पुर्जी जारी भएको थियो।
‘स्क्याम’सँगै बैंकका प्रबन्धक यादव, आसमा खातुन, बसिरन खातुन, व्यवसायी मो. समसाद, तत्कालीन सनराइज बैंक शाखा राजविराजका वरिष्ठ सहायक दीपेन्द्र यादव, भूमिसुधार तथा मालपोत कार्यालय राजविराजका कम्प्युटर अपरेटर दीपक शर्मा र व्यवसायी शंकर यादव फरार छन् ।
के हो यो प्रकरण ?
गत माघमा अर्काको जग्गाको खडा गरिएको फर्जी कागजातहरुको आधारमा एनआइसी एसिया बैंकबाट एएस ट्रेडर्स एन्ड सप्लायर्सका नाममा २ करोड ८० लाख रुपैयाँ ऋण प्रवाह भएको थियो । उक्त टेडर्सको प्रोप्राइटर राजविराज नगरपालिका-९की आसमा खातुन हुन । पक्राउ परेका मो.सद्दाम उनै आसमा खातुनका पति हुन् ।
आसमा प्रोप्राइटर रहेको उक्त सप्लायर्सलाई बैंकले ऋण दिँदा उनकी सासु बसिरन खातुनका नाममा रहेको सप्तरीको साविक प्रसवनी गाविस ९को कित्ता नम्बर २२१ को १० कट्ठा ५ धुर जग्गा धितो राखिएको छ । तर मालपोत कार्यालय सप्तरीको अनुसार उक्त जग्गा बरिसनको नाममा नभई रवीन्द्रकुमार यादवको नाममा दर्ता रहेको छ ।
र रविन्द्रले तत्कालीन सिर्जना फाइनान्सबाट २० लाख रुपैयाँ ऋण लिएकोले ०७४ साल चैत २८ देखि नै उक्त जग्गा रोक्का छ ।
पक्राउ गरिएका मो. सद्दामका साथी मो. समसादले आफ्नो एउटा जग्गा रहेको र उक्त जग्गा तिम्रो आमाको नाममा पास गराई बैंकमा राखेर ऋण लिई व्यापार व्यवसाय गर्ने योजना सुनाउँदा योजनामा सद्दामले सहमति जनाएका थिए । त्यसपछि रवीन्द्रको नाममा रहेको जग्गाको फर्जी लालपुर्जा बसिरन खातुनका नाममा र फर्जी रोक्का कागज तथा लिखत बनाएर बैंकमा पेस गरी २ करोड ८० लाख ऋण निकालिएको थियो ।
ऋणको रकम सद्दामकी श्रीमती आसमाको खातामा आएपछि समसादको खातामा र त्यसपछि अन्य विभिन्न व्यक्तिका खातामा
गएको थियो ।
