क्रान्ति केन्द्र सम्वाददाता
राजविराज । सप्तरीमा पछिल्लो २४ घण्टा भित्र चार जनाको अकाल मृत्यु भएको छ । जिल्लाको बिभिन्न ठाउँमा बिषादी सेवन, सडक दुर्घट्ना र झुण्डिएर चार जनाको ज्यान गएको प्रहरीले जनाएको छ ।
बुधबार साँझ अग्निसाईर कृष्णसवरण गाउँपालिका- ५ छबकी बस्ने जोगिन्द्र महतोको छोरी २२ बर्षकी प्रियाङका कुमारी महतोले विषादी सेवन गरिन् । उनलाई उपचारको लागि छिनमस्ता अस्पताल राजबिराज ल्यायो । यद्यपी उनको ज्यान जोगिन सकेन् । उनको उपचारको क्रममा राति १२ बजे मृत्यु भयो ।
त्यस्तै बुधबार राजबिराज नगरपालिका- ६ स्थित सखडा मोडबाट नेता चौक तर्फ जाँदै गरेको सिमेन्ट घोल्ने मिकस्चर मेसिनले बिपरित दिशाबाट आउँदै गरेको साईकल यात्रीलाई ठक्कर दियो । ठक्करले गम्भीर घाइते भएका साइकल यात्री हनुमाननगर कंकालिनी नगरपालिका- ८ बेलाहा बस्ने ८६ बर्षको उचितलाल मण्डललाई उपचारको लागि छिन्नमस्ता अस्पताल राजबिराज ल्यायो । तर उनले राति साढे १२ बजे उपचारको क्रममा अस्पतालमा प्राण त्यागे ।
मिक्सचर चालक खड्क नगरपालिका-५ खोजपुर बस्ने बिजली चौधरीको छोरा २४ बर्षको अशोक चौधरी र सह-चालक रुपनी गाउँपालिका -२ बस्ने कमल प्रसाद चौधरीको छोरा २४ बर्षको नरेश कुमार चौधरी जिल्ला प्रहरी कार्यालय सप्तरीको नियन्त्रणमा रहेको कार्यालयका प्रवक्ता डिएसपी नरेश कुमार सिंहले जानकारी दिए ।
बुधबार बेलुका रुपनी गाउँपालिका -०५ धुरगाम टोल बस्ने रमेश दासको श्रीमती २५ बर्षकी बबि दास आफ्नै घरको सुत्ने कोठाको धरैनमा साडिको पासो लगाई झुण्डिएको अवस्थामा मृत फेला परिन् भने बिहिबार बिहान बोदेबर्साईन नगरपालिका- ८ वैरियाही वस्ने बिरेन्द्र कुमार यादवको छोरा २० बर्षको चित्ररंजन कुमार यादव सोही ठाउँका श्रीलाल यादवको बगैंचामा रुखमा नाईलनको डोरीको पासो लगाई झुण्डिएको अवस्थामा मृत फेला परे । उनीहरूको झुण्डिनु कारण थाहा चल्न नसकेको प्रहरीको भनाई छ । प्रहरीले यसमा थप अनुसन्धान गरिरहेको जनाएको छ ।
