क्रान्ति केन्द्र सम्वाददाता
मधेश प्रदेशका निवर्तमान अर्थमन्त्री शैलेन्द्र प्रसाद साहले कृषि, उद्योग र पर्यटन मधेश प्रदेशको आर्थिक र समृद्धिको लागि महत्वपूर्ण सम्भावना भएको क्षेत्र रहेको बताएका छन् ।
‘विगतमा गरिएको विकासका असल अभ्यास र सिकाईलाई आत्मसात गर्दै १० वर्षे कार्य योजना बनाई यस क्षेत्रको दिगो विकासका माध्यमबाट समुन्त र समृद्ध प्रदेश बानाउन सकिन्छ ।’ उनले भने ‘वैज्ञानिक, ब्यवसायिक, बजार तथा उपभोक्तामुखी कृषि प्रणालीको विकास मार्फत कृषि क्षेत्रलाई प्रतिस्पर्धी, दिगो, आत्मनिर्भर र निर्यातमुखी वनाउनु पर्छ। सहकारी र सामूहिक कृषि प्रणाली मार्फत कृषिको उत्पादन र उत्पादकत्व अभिवृद्धि गरिनु पर्छ । आवश्यक संरचनागत विकास मार्फत कृषि क्षेत्रको आधुनिकीकरण, यान्त्रिकीकरण र औद्योगिकीकरण गर्नु पर्छ ।’
उद्योग क्षेत्र आर्थिक समृद्धिको एक महत्वपूर्ण आधारको रुपमा रहेको भन्दै उनले आर्थिक समुन्नती हासिल गर्नका लागि दिगो, रोजगारमूलक र उच्च प्रतिफलयुक्त औद्योगिक विकास गर्नु अहिलेको आवश्यकता रहेको बताए ।
‘अहिले उद्योगजन्य पूर्वाधारको विकास, उत्पादन र उत्पादकत्वमा अभिवृद्धि, रोजगारीको थप अवसरहरुको सिर्जना, स्थानीय श्रम र सीपमा आधारित उद्योगको प्रवर्द्धन र विकासका साथै निर्यात प्रवर्द्धन र आयात व्यवस्थापन गर्ने गरी उद्योग क्षेत्रको समग्र विकास गरिनु पर्छ । यसकालागि निजि क्षेत्रलाई आकर्षित गरिनु पर्छ ।’ उनले भने ‘प्राकृतिक एवम सांस्कृतिक सम्पदा र विविधताको कारण प्रदेशलाई आकर्षक, सुरक्षित र मनोरञ्जनात्मक पर्यटकमैत्री गन्तत्व बनाउने दीर्घकालिन सोच बनाउनु पर्छ । पर्यटन बजारमा प्रदेशलाई प्रमुख आकर्षक पर्यटकीय गन्तव्यको रुपमा विकास गर्नु पर्छ । नयाँ पर्यटकीय स्थलहरूको पहिचान र विविधीकरण गर्दै पर्यटकीय पूर्वाधार विकासमा निजी क्षेत्रको लगानी प्रवर्द्धन गर्नु पर्छ। पर्यटन पूर्वाधारमा आधुनिक प्रविधिको प्रयोग गरी पर्यटन सेवालाई प्रभावकारी, सुरक्षित र विश्वासिलो बनाउनु पर्छ।’
उनले यी प्रयासहरुबाट पर्यटक आगमन र रोजगारीका अवसरमा उल्लेखित वृद्धि भई जनताको जिवन स्तरमा उल्लेख्य सुधार हुने विश्वास व्यक्त गरेका छन् ।
