क्रान्ति केन्द्र सम्वाददाता
प्रतिनिधि सभा सदस्य उपेन्द्र यादवले नेताहरुलाई विकासको काममा पार्टीगत सोचमा परिवर्तन ल्याउन आवश्यक रहेको बताएका छन् । बुधबार सप्तरीको राजविराजस्थित गजेन्द्रनारायण सिंह अस्पतालमा आयोजना गरिएको नवनिर्मित नर्सिङ कलेज भवनको समुद्घाटन कार्यक्रममा उनले यस्तो बताएका हुन् ।
जनता समाजवादी पार्टी नेपालका अध्यक्ष समेत रहेका यादवले कार्यक्रममा बिभिन्न पार्टीलाई आमन्त्रणा भएपनि उनीहरु कार्यक्रममा नआएको प्रति दुख व्यक्त गरे ।
‘यो काम यस पार्टीको हो त्यस पार्टीको हो सोच रहेका नेताहरुलाई सोचमा परिवर्तन ल्याउनुपर्छ ।’ उनले भने ‘नर्सिङ कलेज भवन निर्माण कुनै पार्टीको काम होइन्, विकासको काम हो सबैलाई यस कलेजको काममा सहयोग गर्न आग्रह गर्दछु ।’
सप्तरी-२ बाट प्रतिनिधि सभा सदस्य निर्वाचनमा पराजित भएपछि बार-२ बाट उपनिर्वाचनमा निर्वाचित उनले आफु बारा गएपनि सप्तरीको विकास निरन्तर भइरहने बताए । ‘तपाईहरुले बारा पठाउनु भयो, बाराप्रति पनि दायित्व छ ।’ उनले भने ‘तर सप्तरीमा पनि विकासको काम अगाडि बढने नै छ ।’
गजेन्द्र नारायण सिंह अस्पताललाई पुर्वी नेपालको धरान पश्चातको सबभन्दा ठूलो अस्पतालको रुपमा बनाउने तयारी रहेको उनले बताए । ‘रामराजा सिंह स्वास्थ्य विज्ञान प्रतिष्ठानको काम पनि अगाडि वढ्ने नै छ ।’ उनले भने ।
कुनै समयमा शिक्षामा अंग्रपंक्तीमा रहेको सप्तरी अहिले बेरोजगारी, अशिक्षाको मारमा रहेको भन्दै उनले दुख व्यक्त गरे । ‘सप्तरीलाई शिक्षाको केन्द्र बनाउन, रोजगारी र सेवा उपलब्ध हुने कार्यक्रमहरु अगाडि बढाइएको छ ।’ उनले भने ‘आएका योजनाहरु पुरा भए सप्तरी सबैभन्दा विकसित जिल्ला हुने सम्भावना छ ।’
राजविराज नगरपालिकाको कार्यवाहक नगरप्रमुख इसरत परविनको अध्यक्षता तथा उपेन्द्र यादवको प्रमुख आतिथ्यमा राजविराज नगरपालिकाले आयोजना गरेको उक्त कार्यक्रममा संघीय सांसद रञ्जु ठाकुर, सप्तरीका प्रमुख जिल्ला अधिकार भुपेन्द्र थापा, गजेन्द्र नारायण सिंह अस्पतालका मेसु प्रकाश साह लगायतकाले मन्तव्य व्यक्त गरे ।
