श्रवण वत्स
सप्तरीमा अपराधिक घटनाहरू कमी आउन सकेको छैन् । जिल्ला भित्र गत दुई बर्षमै आधा दर्जन हत्याका घटनाहरु भएका छन् । तर अहिले सम्म दोषीलाई कारबाहीको दायरामा ल्याउन सकिएको छैन् । हत्या, चोरी जस्ता घटनाहरुमा संलग्न रहेका पक्राउ नपर्दा सर्वसाधारणमा त्रास फैलिन थालिएको छ ।
बैशाख ३१ गते रुपनी गाउँपालिका–१ रायपुरस्थित सडक छेउमा शम्भुनाथ नगरपालिका–२ खैरबनाका २१ वर्षीय मो.तफेजुल मृत अवस्थामा फेला परेका थिए ।
सो घटनामा प्रहरीले तत्कालै अनुसन्धान त थाल्यो तर अहिले सम्म निष्कर्ष निकाल्न सकेको छैन् । त्यस घटनाको एक सातामै हनुमाननगर कंकालिनी गाउँपालिका–४ मधवापुरमा एक युवक घाँटी रेटिएको अवस्थामा मृत फेला परे ।
झण्डै डेढ वर्ष पहिला छिन्नमस्ता गाउँपालिकामा केही दिनकै फरकमा दुई जनाको हत्या भयो । त्यसकै केही महिना पछि जिल्लाको कञ्चनरुप नगरपालिकामा हत्या गरिएको अवस्थामा शव फेला पर्यो । तर दोषीको पता लाग्न सकेको छैन् । यद्यपी कञ्चनरुपमै पैसाको लागी करेन्ट लगाएर हत्या गरेका तीन जनालाई प्रहरीले एक महिना अगाडि पता लगाएर सार्वजनिक पनि गरे । तर हत्यामा अधिकांश घटनाका दोषीको पता लाग्न सकेको छैन् ।
यता जिल्ला प्रहरी कार्यलय सप्तरीका प्रवक्ता प्रहरी नायब उपरीक्षक नरेश कुमार सिंहले सुरक्षामा प्रहरी २४औं घण्टा तत्पर रहेको बताए । उनले भारतसँग जोडिएको सिमा क्षेत्रमा समेत ह सुरक्षा ब्यवस्थापन कडा नै रहेको बताए । हत्याराको पता लगाउन अनुसन्धानमा रहेको भन्दै उनले चाडैं अपराधीलाई नियन्त्रणमा लिने बताए । हनुमाननगर कंकालिनीको घ अहिले सम्म मृतको सनाखत समेत भएको छैन ।
प्रमुख जिल्ला अधिकारी भुपेन्द्र थापाले सुरक्षा ब्यवस्थापनमा कुनै किसिमको कमी कमजोडी नरहेको दाबी गरे ।
घटनाबारे उनले भने ‘हामी अनुसान्धानमा लागेकै हौँ । अपराधीलाई चाँडो भन्दा चाँडो नियन्त्रणमा लिने प्रयासमा छौं ।’
उनले सिमा क्षेत्रमा सुरक्षाको लागि भारतको बिहार राज्यका जिल्ला अधिकारीसँग समेत कुरा भएको बताए । उनले सर्वसाधारणलाई नडराउन आग्रह गरे ।
