प्रवेश कुमार बाबुल
प्रतिनिधि सभा सदस्य तथा पुर्व उपप्रधानमन्त्री उपेन्द्र यादवले अल्पविकसित तथा पिछडिएको मुलुकलाई कृषि क्रान्ति मार्फत समृद्ध मुलुकमा रुपान्तरण गर्न सम्भव रहेको बताएका छन् ।
आइतबार सप्तरीको राजविराजस्थित कृषि विश्वविद्यालयमा कृषि स्नातक कक्षा शुभारम्भ समारोहमा प्रमुख अतिथिको आसनबाट बोल्दै जनता समाजवादी पार्टी नेपालका अध्यक्षसमेत रहेका यादवले कृषि तथा शिक्षालाई आधुनिकिकरण गर्नुपर्नेमा जोड दिँदै कृषकको हातमा प्रविधि पुर्याएर कृषिमा क्रान्ति ल्याउनु पर्ने बताए । त्यसको लागि राम्रो कृषि शिक्षा र भुमि नीतिमा परिवर्तनको आवश्यकता रहेको उनले औल्याए ।
‘विगतमा कृषि र भुमि व्यवस्था परम्परागत रहेकोले उत्पादनमा कमी आयो,’ उनले भने ‘सिँचाई, मलखाद जस्ता विभिन्न चिज अर्को पाटो हो, तर नितिगत परिवर्तन हुनसकेन् त्यसैले उत्पादन भएन् ।’
आर्थिक विकासको लागि, गरिब र बेरोजगारी अन्तको लागि कृषि शिक्षा महत्वपूर्ण रहेको यादवको भनाई छ ।
‘कृषि जनशक्तिको विश्वभरि नै माग छ र प्रविधिको पनि अभाव छ ।’ उनले भने ‘अनुसन्धान गरेर, जनशक्ति तयार गरेर र किसानको मित्र बनेर समान्य प्रविधि निर्यात गर्न सके अहिलेको देश तथा मधेश समाज अगाडि वढ्ने अवस्था छ ।’
उनले कृषि विश्वविद्यालयमा जोड दिनुको कारण समाजको परिवर्तन रहेको बताए ।
कृषि विश्वविद्यालयको उपकुलपति बैद्यानाथ महतोको अध्यक्षतामा आयोजित कार्यक्रममा विशिष्ट अतिथि मधेश प्रदेशका मुख्यमन्त्री सरोज कुमार यादव तथा शिक्षा प्रविधि तथा बाणिज्य मन्त्री महेश प्रसाद यादव लगायतकाले मन्तव्य व्यक्त गरे ।
