प्रवेश कुमार बाबुल
सप्तरीका व्यवसायीहरुले गरी खाने वातावरण बनाइदिन सरोकारवालाहरुसँग गुहार गरेका छन् । शनिबार राजविराजस्थित उद्योग वाणिज्य संघ सप्तरीको हलमा आयोजित उद्योग वाणिज्य संघको केन्द्रीय सदस्यमा निर्वाचित अरुण कुमार प्रधानको सम्मान कार्यक्रममा व्यवसायीहरुले यस्तो भनेका हुन् ।
कार्यक्रम बोल्दै उद्योग वाणिज्य संघ सप्तरीका अध्यक्ष लालु प्रसाद अग्रवालले खुला सीमा नाकाका कारण जिल्लाका व्यावसायीहरु मारमा रहेको बताएका छन् ।
‘भारतसँग जोडिएको खुला सीमा नाकाहरुबाट तस्करी गरेर समानहरु ल्याउने गर्छन्,’ अग्रवालले भने ‘हामी व्यवसायीलाई त गरी खाने वातावरण नै छैन् ।’
यस विषयमा सरोकारवालाहरुलाई पटकपटक जानकारी गराएपनि कसैले नसुनेको उनले गुनासो गरे ।
‘सिडिओलाई पनि ज्ञापन पत्र बुझाएको थियोँ, तर माग कागजमा मात्रै सीमित रह्यो ।’ उनले भने ‘खुला सिमानाकामा तस्करी त झन बढ्दै गएको छ ।’
यता बैंकमा ७ बाट १४ प्रतिशत व्याज तिर्नुपरेको बाध्यता रहेको भन्दै उनले सरोकारवालाहरुसँग व्यवसायीहरुको लागि गरी खाने वातावरण बनाइदिन गुहार गरे ।
कार्यक्रममा नेपाल उद्योग वाणिज्य महासंघको ५७औं साधारण सभाबाट केन्द्रीय सदस्यमा नवनिर्वाचित सप्तरीबासी अरुण कुमार प्रधानले उद्योग वाणिज्य महासंघको केन्द्रीय नेतृत्वमा पठाएकोमा आफु सप्तरी उद्योग वाणिज्य संघको ऋणी रहेको बताए ।
उनले अहिले ३५ प्रतिशत व्यवसायीहरुलाई व्यवसाय बन्द गर्नुपर्ने अवस्था तथ्याङ्कले देखाएको भन्दै दु:ख प्रकट गरे ।
‘कृषि प्रधान देश भएर पनि चामल र गहुँ आयत गर्ने अवस्था आइपुग्नु दुर्भाग्यपुर्ण हो ।,’ उनले भने ‘व्यवसाय मैत्री निति ल्याउन म निर्वाचित भएको छुँ ।’
केन्द्रीय नेतृत्वमा व्यवसायीको हितको लागि आफु दृढ रहने उनले बताए । व्यवसायीको हितको लागि काम गरेर आफुले सप्तरी उद्योग वाणिज्य संघको ऋण चुकाउने उनले बताए ।
कार्यक्रम पत्रकार महासंघ सप्तरीका अध्यक्ष श्रवण कुमार देवले भारतबाट तस्करी गरेर ल्याएको सामान खरिद गर्ने त्यही व्यवसायीहरु मध्येको रहेको भन्दै उद्योग वाणिज्य संघको ध्यानाकर्षण गराए । त्यस्तालाई पता लगाउनु पनि बहुत जरुरी रहेको उनले बताए ।
कार्यक्रममा प्रमुख अतिथि राजविराज नगरपालिकाका कार्यवाहक नगरप्रमुख इसरत परविन, उद्योग वाणिज्य संघ सप्तरीका पुर्व अध्यक्षहरू लगायतका वक्ताहरुले मन्तव्य राखे ।
नेपाल उद्योग वाणिज्य महासंघको केन्द्रीय समितीमा सप्तरीबाट पहिलो पटक सहभागीता भएको छ ।
