क्रान्ति केन्द्र सम्वाददाता
आजको समयमा पनि तराईमा विना दाइजो विवाह हुने गरेको विरलै हुन्छ । यसबिच सप्तरीका एक युवाले विनादाइजो आदर्श विवाह गरेका छन् । राजविराज नगरपालिका– ५ का विनोद यादवले विनादाइजो विवाह गरेका हुन् ।
विनोद नेपाल विद्युत् प्राधिकरणबाट आवकाश प्राप्त कर्मचारी असर्फी यादवका छोरा हुन् । घरमा विवाहको कुरा चलेपछि विनादाइजो (आदर्श) विवाह गर्ने सहमतिमा मात्रै उनी विवाह गर्न राजी भएका थिए । उनले मोरङको जहदा गाउँपालिका– १ का अर्जुन यादवकी छोरी कृति यादवसँग विवाह गरेका हुन् । कृतिका बुवा भने सामान्य किसान हुन् ।
दुवैतर्फका परिवार शिक्षित भएका कारण उनीहरू विनादाइजो विवाहका लागि सहमत भएका थिए ।दाइजोकै कारण तय भएको विवाहसमेत नहुने, दाइजो नदिएका कारण बुहारीलाई अमानवीय व्यवहार गरिनेजस्ता घोर निन्दनीय घटना भइरहँदा विनादाइजोको विवाह भइरहेको भनी जानकारी पाएपछि उनीहरूलाई बधाईसहित शुभकामना दिन प्रतिष्ठित व्यक्तित्वहरूसमेत वैवाहिक समारोहमा उपस्थित भए ।
नेपाल फोटो पत्रकार महासंघका केन्द्रिय सचिव संचारकर्मी सौरभ यादवले नमूना जोडीलाई बधाई एवम् शुभकामना दिए । दुलहा–दुलहीलाई बधाई एवम् शुभकामना दिँदै उनले समाजिक रुपान्तरणका लागि चालेको कदमले सिङ्गो मानव सम्भयतालाई गौरवान्वित तुल्याएको उनले भने ।
प्रेस मंच सप्तरीका सचिव बिद्यानन्द रामले समेत नमूना जोडीलाई शुभकामना दिँदै शिक्षित युवाहरु समेत दाइजोरुपी लेनदेनको नाममा खरिद–विक्री भईरहेको भन्दै यसतर्फ सिङ्गो समाज गम्भीर हुनुपर्ने तथा युवायुवतीले समेत यस विरुद्ध खुलेर अगाडि बढ्नुपर्ने बताए ।
विनोदले दाइजो प्रथालाई निर्मूलीकरण र समाजमा छोरीप्रतिको सकारात्मक सन्देश दिन आदर्श विवाह गरेको बताए । ‘सामाजिक परिवर्तनका लागि सुरुवात आफैँबाट गर्नुपर्छ,’ विनोदले भने ‘दाइजो लिनेलाई समाजले बहिष्कार गर्नुपर्छ ।’
दुलही कृतिले छोरा–छोरीबीचको विभेद मेटाएर अभिभावकहरूले छोरासरह छोरी पढाएर सक्षम बनाउने तथा शिक्षित युवाहरूले दाइजोलाई बहिष्कार गर्नुपर्ने बताइन् । पढेलेखेका युवाहरू नै दाइजोरूपी लेनदेनमा संलग्न हुन्छन् भने शिक्षा र उपाधिको कुनै अर्थ नहुने उनको भनाइ छ ।
