प्रवेश कुमार बाबुल
जसपा निकट विद्यार्थीहरुले बुधबार साँझ सप्तरीको राजविराजमा मसाल जुलुस प्रदर्शन गरेको छ । जिल्ला प्रहरी कार्यालय सप्तरीका ईन्सपेक्टर नविन थापा मगरले मंगलबार जसपाका सप्तरी जिल्ला अध्यक्ष केदार यादवलाई हातपात गरेको भन्दै उनीहरुले त्यसको विरोधमा प्रदर्शन गरेका हुन् ।
राजविराजको शिव मन्दिर प्राङ्गणबाट सुरु भएको जुलुस जिल्ला प्रशासन कार्यालय सप्तरीको अगाडि हुँदै मुख्य बजारको परिक्रमा गर्दै जिल्ला प्रहरी कार्यालय अगाडि पुगेको थियो । जुलुसको क्रममा प्रदर्शनकारीहरुले दोषी प्रहरी ईन्सपेक्टरलाई कारबाही गर, प्रहरी दमन बन्द गर, प्रहरी प्रशासन मुर्दाबाद लगायतका नाराबाजी गरेका थिए । जिल्ला प्रहरी कार्यालय अगाडि टायर बालेर नाराबाजी गर्दै गर्ने क्रममा बिद्यार्थी संगठन तथा जसपाका नेताकार्यकर्ता र प्रहरी बिच घम्साघम्सी समेत भएको छ ।
मंगलबार जिल्लाको महादेवा गाउँपालिकाको एकजनाको मुद्दामा छलफल गर्न जिल्ला प्रहरी कार्यालय गएका यादवमाथि प्रहरी निरीक्षकद्वारा हातपात गरिएको भन्दै उनको समर्थक मंगलबारदेखि नै आन्दोलित बनेका छन् ।
