क्रान्ति केन्द्र सम्वाददाता
जनता सवाजवादी पार्टी नेपालका सप्तरी जिल्ला अध्यक्ष केदार यादवलाई प्रहरीद्वारा मंगलबार कुटपिट गरिएको छ । प्रहरी निरीक्षक नविन थापा मगरले अध्यक्ष यादवलाई जिल्ला प्रहरी कार्यालाय भित्र कुटेको छ ।
अध्यक्ष यादवलाई प्रहरीले हातपात गर्दै टाउको फुटाएको भन्दै जसपाका कार्यकर्ताहरुले राजविराजमा थापा मगरलाई कारबाहीको माग गर्दै प्रदर्शन गरिरहेका छन् ।
जिल्ला प्रहरी कार्यालयका प्रवक्ता डिएसपी नरेश कुमार सिंहका अनुसार अध्यक्ष यादव महदेवा गाउँपालिकाको मुद्दालाई लिएर प्रहरी कार्यालय भित्र छलफलमा आएका थिए । त्यस क्रममा प्रहरी निरीक्षक मगरसँग उनको विवाद भएपछि प्रहरी निरीक्षक थापामगरले हातपात गरेको हुन् । हाल थापामगर प्रहरीको नियन्त्रणमा रहेको डीएसपी सिंहले बताए ।
यादवमाथि कुटपिटको घटनाबारे सप्तरीका प्रमुख जिल्ला अधिकारी भूपेन्द्र थापाले छलफलको क्रममा चर्काचर्की भई प्रहरी निरीक्षकले जसपा जिल्ला अध्यक्ष केदार यादवमाथि हातपात गरेको सूचना आफूले पनि पाएको बताए । यसबारे थप अनुसन्धान गरि दोषीमाथि कारबाही गरिने थापाले बताए ।
