क्रान्ति केन्द्र सम्वाददाता
तिलाठी कोइलाडी गाउँपालिकाद्वारा सञ्चालित गाउँपालिका स्तरीय टी ट्वान्टी क्रिकेट प्रतियोगिताको फाइनल वडा नं. ४ कोइलाडी र वडा नं. ५ को. बर्साइनबीच हुनेछ । सोमबार वडा नं. ७ मन्सापुरलाई ५ विकेटले पराजित गर्दै वडा नं. ४ कोइलाडी फाइनलमा प्रवेश गरेको हो । कोइलाडी र को. बर्साइनबीच फाइनल खेल शनिबार हुने गाउँपालिकाका कार्यक्रम अधिकृत राजेश कुमार झाले बताए ।
टस जितेर ब्याटिङ्ग गरेको मन्सापुरले कमजोर ब्याटिङ्ग प्रदर्शन गर्दा निर्धारित २० ओभरमा ६ विकेट गुमाएर १०१ रन मात्र बनाउन सक्यो । मन्सापुरकालागि सुवेश मण्डलले सर्वाधिक ३५ रन बनाए भने महेश मण्डलले अविजित २८ र चेतन यादवले १८ रन बनाए । कोइलाडीकालागि रोशन मण्डलले २ तथा मो. गुड्डु र बिहारी मण्डलले १/१ विकेट लिए ।
जितको लागि १०२ रनको लक्ष्य पछ्याएको कोइलाडी टिम १६ ओभर २ बलमा ५ विकेट गुमाई विजयी हासिल गर्दै फाइनल प्रवेश गरेको हो । कोइलाडीका लागि देवेश मण्डलले अविजित २८, मो. गुड्डुले १५, रोशन मण्डलले ११ र जितेन पासवानले १० रनको योगदान दिए । मन्सापुरकालागि चेतन यादव र राजकुमार मण्डलले २/२ तथा देवकीनन्दन मण्डलले १ विकेट लिए ।
उक्त खेलमा कोइलाडीका रोशन मण्डललाई म्यान अफ द म्याच घोषित गरिएको प्रतियोगिता संयोजक ज्ञानेन्द्र कुमार यादवले बताए ।
