क्रान्ति केन्द्र सम्वाददाता
बैशाख १० गते हुने उपनिर्वाचनमा बारा २ बाट जनता समाजवादी पार्टी नेपालका अध्यक्ष उपेन्द्र यादवसहित १७ जनाले उम्मेदवारी दर्ता गराएका छन् । कलैया स्थित जिल्ला समन्वय समितिको कार्यालयमा स्थापना गरिएको मुख्य निर्वाचन अधिकृतको कार्यालयमा उनीहरूले सोमबार मनोनयन दर्ता गराएका हुन् ।
उक्त निर्वाचनमा अध्यक्ष यादव नेपाली कांग्रेस, माओवादी केन्द्र, लोकतान्त्रिक समाजवादी पार्टी र नेकपा एकीकृत समाजवादीको साझा उम्मेदवार हुन् भने एमालेका पुरुषोत्तम पौडेल, जनमत पार्टीका शिवचन्द्र कुशवाहा, रास्वपाबाट रमेश खरेल, हाम्रो नेपाली पार्टीका चन्द्रप्रकाश सुवेदी, नेपाल मजदुर किसान पार्टीका मुक्ति यादव, स्वतन्त्र उम्मेदवारहरु विनोद कुमार कर्ण, वलाल हजरा लगायतकाले आफ्नो मनोनयन पत्र दर्ता गराएको मुख्य निर्वाचन अधिकृत मुकेश उपाध्यायले जानकारी दिए ।
मंसिर ४ मा सम्पन्न प्रतिनिधिसभा निर्वाचनमा सो क्षेत्रबाट हालका उपराष्ट्रपति राम सहाय यादव जनता समाजवादी पार्टीबाट निर्वाचित भएका थिए । उनी १३ हजार ८ सय २२ मत ल्याएर निर्वाचित भएका थिए । यसपटक जनमत पार्टीबाट उम्मेदवार बनेका तात्कालीन माओवादी केन्द्रका शिवचन्द्रप्रसाद कुशवाहा उनको निकटम प्रतिद्वन्द्वी रहेका थिए । उनले १३ हजार ४ सय ६८ मत ल्याएका थिए ।
