क्रान्ति केन्द्र सम्वाददाता
मिटरब्याजीको आरोपमा जनमत पार्टीका केन्द्रीय सदस्य सुरेन्द्रप्रसाद शर्मा ‘सुरेन्द्र मधेशी’लाई सप्तरी प्रहरीले पक्राउ गरेका छन् ।
सप्तरीको विष्णुपुर गाउँपालिका–७का शर्मालाई सोमबार हाल राजविराज–७ स्थित रहेको उनको घरबाटै पक्राउ गरिएको हो । शर्मामाथि ईलाका प्रहरी कार्यालय कल्याणपुरमा आपराधिक विश्वासघात र ठगी मुद्दामा जाहेरी परेको र अदालतबाट पक्राउ अनुमति प्राप्त भएपछि नियन्त्रणमा लिइएको सप्तरी प्रहरीका प्रवक्ता डिएसपी नरेशकुमार सिंहले जानकारी दिए ।
सप्तरीको बोदेवरसाइन नगरपालिका- १०का निर्मलकुमार यादवको जाहेरीले उनीमाथि कारबाही चलाइएको प्रहरीले जनाएको छ ।
जाहेरीकर्ता निर्मलका बुबा शंकर यादवले पक्राउ गरिएका सुरेन्द्रका बुबा सत्यनारायण शर्मासँग २०६६ सालमा घर खर्चका लागि भन्दै २५ लाख रुपैयाँ ऋण लिएका थिए ।
ऋण लिँदा शंकर यादवले सत्यनारायण शर्मालाई शम्भुनाथ नगरपालिका–७ स्थित आफ्नो ८ बिघा ७ कट्ठा ७ धुर जग्गा लिखत पास गरिदिएका थिए । पछि सत्यनारायणले उक्त जग्गा आफ्नो छोरा सुरेन्द्रको नाममा पास गरिदिएका थिए ।
अहिले ऋणीले पूरै ऋण चुक्ता गर्दा पनि सुरेन्द्रले जग्गा फिर्ता गर्न नमानेपछि प्रहरीमा जाहेरी परेको हो । पक्राउ परेका शर्मालाई म्याद थप गरी थप अनुसन्धान अघि बढाउने तयारी थालेको डिएसपी सिंहले बताए ।
