गाउँपालिका स्तरीय क्रिकेटमा कोइलाडी र को. बर्साइनको जित

क्रान्ति केन्द्र सम्वाददाता

तिलाठी कोइलाडी गाउँपालिकाद्वारा सञ्चालित गाउँपालिका स्तरीय टी ट्वान्टी क्रिकेट प्रतियोगिता अन्तर्गत बुधबार सम्पन्न दुई खेलमा वडा नं. ४ कोइलाडी र वडा नं. ५ को. बर्साइनले जित हात पारेको छ ।
पहिलो खेलमा वडा नं. ४ कोइलाडीले वडा नं. २ लौनियाँलाई ५० रनले तथा दोस्रो खेलमा वडा नं. ५ को. बर्साइनले वडा नं. ३ सकरपुरालाई ३९ रनले पराजित गरेको छ ।
विहान सम्पन्न खेलमा टस जितेर ब्याटिङ गरेको कोइलाडीले निर्धारित २० ओभरमा ९ विकेट गुमाएर ८९ रन बनाएको थियो । जसमा रोशन मण्डलले सर्वाधिक ३२ रन बनाएका थिए भने सरोज मण्डलले १० रन बनाएका थिए । अन्य कुनै पनि ब्याटर दोहोरो अंकमा प्रवेश गर्न सकेनन् । लौनियाँका लागि सरोज कुमार मण्डल र शिवराम मण्डलले ३/३ तथा अजित कुमार मण्डलले २ र रमानन्द मण्डलले १ विकेट हात पार्न सफल भएका थिए ।
जितको लागि ९० रनको लक्ष्य पछ्याउने क्रममा लौनियाँ टिम कोइलाडीका मो. गुड्डु र जुगनु मण्डलको घातक बलिङ सामू निरीह साबित भए । मो. गुड्डुले ४ ओभरमा ११ रन खर्चेर ५ तथा जुगनु मण्डलले ४ ओभरमा १५ रन खर्चेर ४ विकेट लिंदै लौनियाँलाई ३९ रनमा अलआउट गर्न सफल भए ।कोइलाडीका लागि रोशन मण्डलले पनि १ विकेट लिएका थिए ।
लौनियाँका लागि सरोज कुमार मण्डलले १० रन बनाउनु बाहेक कुनै पनि खेलाडि दोहोरो अंकमा प्रवेश गर्न सकेनन् । सो खेलमा मो. गुड्डुलाई म्यान अफ द म्याचको पुरस्कार प्रदान गरिएको थियो ।
यसैगरी दोस्रो खेलमा टस जितेर ब्याटिङ गरेको को. बर्साइनले निर्धारित २० ओभरमा ८ विकेट गुमाई १३२ रनको योगफल तयार गरेको थियो । जसमा राहुल रजकले सर्वाधिक ४२ रन बनाए भने प्रकाश मण्डलले २२, सुभाष मण्डलले अविजित १३ तथा अजय मण्डलले ११ रनको योगदान दिएका थिए । सकरपुराका लागि अमित मण्डलले ३, विजय मुखियाले २ तथा साकेत सिंह र रिपुल सिंहले १/१ विकेट लिएका थिए ।
जितको लागि १३३ रनको लक्ष्य पछ्याएको सकरपुरा टिम १६ ओभर ५ बलमा ९३ रनमा अलआउट भयो । जसमा विजय मुखियाले सर्वाधिक ३२ रन बनाए भने अनुराग मिश्रले १३ र मुकेश मण्डलले ११ रनको योगदान गरे । को. बसाइनका लागि दिपेश सरदारले ३ ओभर ५ बलमा ३ रन खर्चेर ४ विकेट लिए भने राजेश दासले २ तथा विशाल शर्मा र राजा रायले १/१ विकेट लिए । उक्त खेलका ‘म्यान अफ द म्याच’ पुरस्कार दिपेश सरदारलाई गाउँपालिकाका कार्यक्रम अधिकृत राजेश कुमार झाले प्रदान गरेका थिए ।
प्रतियोगिता अन्तर्गत विहिबार विहान वडा नं. २ लौनियाँ र वडा नं. ७ मन्सापुरबीच तथा दोस्रो खेल वडा नं. १ तिलाठी र वडा नं. ५ को. बर्साइन बीच हुने प्रतियोगिता संयोजक ज्ञानेन्द्र कुमार यादवले जानकारी दिए ।