क्रान्ति केन्द्र सम्वाददाता
सप्तरीमा आफ्नै श्रीमतीलाई पटकपटक यातना दिने श्रीमानलाई कारागार चलान गरिएको छ । राजविराज नगरपालिका -४का नविन दासलाई आफ्नै श्रीमती आरती दासले दिएको जाहेरीको आधारमा पक्राउ गरी पुर्पक्षका लागि कारागार चलान गरिएको हो ।
नविन तथा उनको परिवारले आरतीलाई माइतीबाट ५० लााख रुपैयाँ ल्याउन भनेपछि नमान्दा उनलाई निर्घात कुटपिट गरेको आरतीले जाहेरीमा उल्लेख गरेकी छिन् । सोही कुटपिटले उनको गर्भ तुहिएको आरतीले बताईन् । कुटपिट पश्चात उनको गरगहना समेत सासुले खोसी लिएको उनले बताईन् ।
घरेलु हिंसा गर्दै शारिरिक मानसिक यातना दिएर घरबाट निकाला गरेपछि अदालत पुगेकी आरती अदालतको संरक्षाणात्मक आदेशाले नविनको घरमा बस्दै आईरहेको बताईन् । तर उनको ससुराली परिवारले घरमा बस्न नदिने तथा अंश हक पचाउने मनसायले कोशी नदीमा परेको जग्गा उनको श्रीमानको नाममा पास गरी अंश बण्डा गरेको उनको आरोप छ ।
सो पश्चात उनले आफ्नो हकको लागी उनीहरूको बिरुद्दमा मुद्दा दायर गरेकी बताईन् । तर, गत पुस ९ गते उनी लोक सेवा आयोगको परिक्षा दिन जनकपुर गएको बेला ससुरालिबालाहरुले उनको कोठामा रहेको समानहरु तोडफोड गरि दिएको उनले बताईन् । उनी घर फर्केपछि सोधखोज गर्दा पचास लाख रुपैयाँ दाइजो ल्याउन भन्दा पुनः उनले नमानेपछि उनलाई उनीहरूले शारीरिक,मानसिक यातना दिएको उनले बताईन् ।
त्यसपछि उनले बिबाह सम्बन्धिको कसुर गरेको हुँदा बिपक्षीहरुलाई पक्राउ गरी कानुन बमोजिम कारवाही गरी पाउँ भन्ने समेत व्यहोराको किटानी जाहेरी जिल्ला प्रहरी कार्यालयमा दिएको आधारमा प्रहरीले फरार रहेका आरोपी नविनलाई पक्राउ गरि पेश गर्दा उनलाई सप्तरी जिल्ला अदालतले पुर्पक्षका लागि कारागार पठाएको जिल्ला प्रहरी कार्यालय सप्तरीका प्रवक्ता डिएसपी नरेश कुमार सिंहले बताए ।
