प्रवेश कुमार बाबुल, श्रवण वत्स
सप्तरीस्थित महेन्द्र विन्देश्वरी बहुमुखी क्याम्पस राजविराजमा स्ववियु निर्वाचनमा समाजवादी विद्यार्थी युनियनबाट सभापति उम्मेदवार रंजित कुमार यादव प्यानल सहित निर्वाचित भएका छन् ।
समाजवादी विद्यार्थी युनियन रंजित कुमार यादब ४२३ मत ल्याएर निर्वाचित भएका छन् भने उनलाई निकटतम प्रतिद्वन्द्वी अनेरास्ववियुका रंजिव कुमार साहले १९९ मत ल्याएका छन् । सचिवमा सवियुका सुनिल कुमार मण्डल ४११ मत ल्याएर निर्वाचित भएका छन् भने उनका निकटतम प्रतिद्वन्द्वी अनेरास्ववियुका सत्य नारायण चाैधरीले १६७ मत ल्याएका छन् ।
काेषाध्यक्षमा सवियुका मेनुका साहले ३१९ मत ल्याएकी छिन् भने उनका निकटतम प्रतिद्वन्द्वी अनेरास्ववियुकी मनिषा साहले २११ मत ल्याएकी छिन् । सदस्यमा सवियुका बिनय यादब ३९०, माे जकाउल्लाह ३७०, रामानन्द राम ३७६, प्रकाश यादब ३८३, कंचन ठाकुर ४०१ नन्दन मण्डल ३९२ ,राकेश यादब ३७६ मत ल्याएर निर्वाचित भएका छन् । सामानुपातिक तर्फ समाजवादी विधार्थी युनियनले २९३ मत ल्याएका छन् । त्यस्तै अखिल क्रान्तिकारी १३७, नेविसंघ संघ १४४ र अनेरास्ववियुले ११४ मत ल्याएका छन् । लोकतान्त्रिक विद्यार्थी संघले ५२, अनेरास्ववियु समाजवादीले ४८ मत प्राप्त गरेका छन् ।
प्रत्यक्ष तर्फ समाजवादी विद्यार्थी युनियन, अखिल क्रान्तिकारी तथा लोकतान्त्रिक विद्यार्थी संघको गठबन्धन रहेको थियो ।
मतदान सम्पन्न भएको तीन दिन पछि बुधबार दिउँसोबाट मतगणना सुरु भएको थियो । आइतबार बेलुका सम्पन्न भएको मबिब क्याम्पसको स्ववियु निर्वाचनको मतगणना नेविसंघ, अनेरास्ववियु, समाजवादी अनेरास्ववियु, जनमत विद्यार्थी संघले मतगणनामा सहमति नजनाउँदा तीन दिनसम्म सुरु हुनसकेको थिएन् । मंगलबार मबिब क्याम्पस निर्वाचन समिति यहाँको अवस्थाबारे स्ववियु केन्द्रीय निर्वाचन समितिलाई जानकारी गराए पश्चात् बुधबार केन्द्रबाट मतगणना जारी गर्न निर्देशन दिएपछि मतगणना सुरु गरिएको थियो ।
सुरक्षाको लागि मविब क्याम्पसमा व्यापक रूपमा नेपाल प्रहरी तथा सशस्त्र प्रहरी परिचालन गरिएको थियो ।
मतदान सुरु भएको केहीबेरपछि देखि नै पटकपटक निर्वाचन स्थगित गर्ने माग गर्दै आएका उनीहरुले मतदान सम्पन्न हुने लगत्तै संयुक्त रुपमा प्रेस विज्ञप्ति नै जारी गरेर निर्वाचन खारेजको माग गर्दै आएका छन् । निर्वाचन अधिकृतले एकलौटी रुपमा समाजवादी विद्यार्थी युनियनलाई जिताउने प्रयास गरेको उनीहरुले आरोप लगाउँदै आएका छन् । उनीहरुले मतगणनामा प्रतिनिधि समेत पठाएनन् ।
